Durante un conferencia di prensa cu Central Bureau of Statistics (CBS) a ofrece ayera tardi, nan a duna di conoce cu manera a wordo plania Censo 2020 lo tuma luga e aña aki na october, a pesar di e situacion di Covid-19 y e crisis economico na e pais.

Asina a duna di conoce director suplente di CBS, Desiree Helder na unda el a splica cu nan ta considera importante pa por haya informacion valido y actual di Aruba. Pa e motibo aki a dicidi di cuminsa cu e Censo dia 1 di october manera a wordo plania.

Di loke ta trata siguridad di e personal di CBS cu lo haci e censo y esunnan na cas cu lo contesta e preguntanan, Helder a indica cu nan lo tene na cuenta cu esey y pa e motibo aki lo haci e censo online, manera Bon Dia Aruba Aruba a trece dilanti den un articulo di dia 07 di augustus ultimo..

Pa 1 di october lo tin disponibel e cuestionario completo online riba e website cu proximamente nan lo duna di conoce.  Ehogarnan cu lo yena e cuestionario via online lo no ricibi un bishita di personal di censo, cu lo cuminsa haci esaki desde 1 di november pa esunnan cu no por a haci’e via online.

Desde 1 di october te cu dia 10 cu e censo lo tuma luga, Helder a expresa cu CBS lo ta disponibel pa personanan cu tin algun duda of pregunta y di e manera aki nan ta sostene cada hogar cu kier yena e formulario online di tur manera cu por.

Helder a trece dilanti cu ta asina importante pa esaki tuma luga na e momentonan aki di crisis pa motibo cu mester di data actualisa, hopi biaha departamentonan di Gobierno ta puntra pa nan con ta para cu Aruba, cuanto hende a perde nan trabou pa via di Covid-19 y di e forma aki nan por tene na cuenta esey den nan maneho y den plannan pa futuro.

“Tur esey cu ta bibando na Aruba  na october 2020 mester wordo conta”, esunnan cu tin un aña bibando of esunnan cu tin intencion di biba mas di un aña na Aruba y p’esey nan ta pidi colaboracion di henter comunidad.

Di mesun manera, Helder a bisa cu pa motibo financiero e biaha aki nan lo no conta cu borchinan grandi riba caminda of un campaña publicitario masivo ya cu e situacion economico no ta permiti esey.

Tambe, Helder a comunica cu nan ta usa un programa desde aña 2016 na unda cu tur e data ta wordo warda den un server na Aruba mes, pa hopi biaha e informacion ta wordo colecta y ta warda na Merca of Europa cu e gobierno mes no tin acceso pa e data y esey ta algo cu nan no kier pa lo pasa, pa e motibo aki nan a huur un server na Aruba mes pa tene e data sigur na unda CBS so tin acceso pa e data, ni un hende mas, Helder a afirma.

Compara cu otro añanan, Helder a indica cu e censo aki lo haya e datanan di biaha y asina por mira si e cuestionario ta completo, el a pone como por ehemplo, cu informacion di e censo di aña 2010 e mita ta riba papel.

Di su banda, Yarelin Kelly persona encarga di personal di censo, a menciona cu  manera nan a informa aña pasa nan tabatin pensa di haya 1.200 persona pa subi riba caya como tellers, pero esey a cambia mirando cu e proceso ta enfoca di manera on line, por ta cu nan lo haya 500 hende pa haci e cuestionario pa esunnan cu no lo por haci’e via e website, pero esey no ta sigur te ainda. Pa cu esaki, Kelly a señala cu e training tambe lo tuma via on line.

Den conferencia tambe a trece dilanti cu Censo a haya algun situacionnan cu no ta mucho agradabel pa hendenan cu no tin confiansa pa un otro persona yega na nan cas y haci preguntanan importante y personal, di esaki Kelly a contesta cu pa por acerca un persona ta un reto y pa e motibo ey nan lo publica riba nan rednan social, radio y TV informacion pa conscientisa e comunidad di pakico ta importante haci e censo.

Damara Rasjmin PR. di comunicacion a duna di conoce cu aña 2019 ora nan a haci e proyecto piloto, nan a haya hopi feedback di e comunidad  y di e mesun tellers di kico ta e preocupacion di e poblacion di Aruba, un di e punto cu a wordo treci dilanti ta cu no tabatin suficiente informacion y cu CBS ta trahando riba dje.

“Nos ta trahando diferente video cu cada tema cu ta den cuestionario pa e personanan por tin un idea di pakico cierto preguntanan ta wordo haci”, Rasjmin a sigura.

E informacion lo wordo comparti den diferente idioma ya cu Aruba ta un isla multicultural igualmente cu e cuestionario.