Ya caba a transcuri 14 dia cu Censo 2020 a inicia di un forma virtual debi na e situacion di Covid. Apenas ta resta 10 dia pa e culmina di forma virtual, pero e ta bayendo hopi slow.

Sinembargo e hecho cu e biaha aki un parti di e censo ta wordo haci di forma virtual, tin un falta di atencion den comunidad, y e ta un reto pa mas hende di nos poblacion por bin cla cu nan cuestionario. P’esey directora interino di Central Bureau of Statistics (CBS), Desiree Helder ta haci un yamado pa tur ciudadano participa den e conteo aki cu ta tuma luga cada 10 aña, y cu ta uno sumamente importante pa nos pais.

A pesar cu Censo 2020 a cuminsa un tiki slow, e ta haya prematuro ainda pa saca cualkier conclusion. Helder a bisa cu te aworaki Censo 2020 ta bayendo bon, pero si hopi mas slow di loke nan a spera. E hendenan ta yenando nan cuestionario, y nan a reforsa e trabao aki cu un team cu ta yudando cu esey.

Team

For di diadomingo ultimo nan tin un team mas amplio ainda pa tuma contacto cu diferente hogar pa mustra nan disponibilidad pa entrevista nan. “Pero nos falta hopi. Nos falta hopi hogar ainda. Hopi persona pa contribui cu esey,” el a declara na Bon Dia Aruba.

Tin ciudadano cu ta hayando via SMS di Setar mensahe breve pa yuda yena e cuestionario di Censo 2020. Tambe na www.census2020.aw/quest/. Of pa mas informacion consulta nan website: www.census2020.aw E acercamento via SMS a sirbi pa haya un gran cantidad di hende pa contesta nan cuestionario, pero ainda falta mas.

Directora interno di CSB cu ta e instancia encarga pa realisa e Censo aki di poblacion y vivienda a bisa cu tin diferente canal cu nan ta uzando pa asina acerca cada ciudadano cu ta forma parti di nos poblacion local. Ya sea pa medio di social media, pero tambe programa di television tur diahuebs pa 7’or anochi.

E ta un forma pa e hendenan compronde di berdad kico ta un censo y pa kico nan ta haci’e. Tambe nan ta haciendo yamadanan pa puntra e hendenan si acaso nan a yena nan cuestionario caba. Sino nan ta ofrece posibilidad di entrevista nan via telefon.

E meta di e censo aki ta esun di conta tur hende. Locual ta registra den Registraduria Nacional (Bevolkings Register) ta 112 mil hende. Banda di esey nos tin hende na Aruba cu no ta registra ya sea pa motibo di nan status legal, pero nan tur ta conta den un censo pa ta completo, Helder a declara. P’esey nan ta purba di e manera virtual aki pa yega na tur hende.

Nan ta compronde cu pa causa di e pandemia aki tin hende cu tin cierto temor pa un hende straño bishita nan cas. P’esey CBS ta ofrece e opcion aki unda e hende for di nan cas of trabao mes si ta posibel, unda cu nan por tin acceso na internet, por cumpli cu e cuestionario online.

Encuanto cual ta e minimo cu nan mester entrevista pa e censo por wordo cualifica como uno exitoso ta un 90% conta. Na 2010 nan tabatin un porcentahe di un 8% cu no a participa. Aworaki CBS ta purba di mantene e mesun cantidad. “Esey ta depende di cuanto hende berdad ta participa,” el a bisa.

Na e momento aki, Helder no por duna un cantidad exacto di e cantidad di persona cu a registra plus e persona cu no a registra. E ta haci dificil pa bisa awor, cuanto hende CBS lo mester tin registra caba. Pero na final, CBS lo compara nan data cu diferente otro instancia, entre nan Registraduria Nacional, pa asina determina cuanto cantidad lo keda falta.

CBS helpdesk

Si den caso no ta wordo logra e target aki, Helder a bisa cu e censo por wordo expande cu mas dia. El a splica cu pa loke ta trata e censo virtual cu ta bay te 24 di october nan ta spera un 30% di e poblacion cu lo coopera cun’e. Si e situacion ta sigui slow por ta nan lo yega mita di e cantidad aki, pero falta ainda varios dia pa 24 di october yega.

Ainda CBS no sa si nan lo logra un 30%, pero desde 1 di november nan lo cuminsa bishita tur hogar cu no a participa di e censo virtual. Kiermen lo tin full luna di november ainda cu lo tin personal di CBS ariba caya cu lo acerca tur vivienda di e persona cu no a haya chens di participa online pa conta nan personalmente.

Nan ta ripara cu e gap generacional por hunga un rol pa mas hende por yena e cuestionario virtual. Vooral hende grandi tin mas dificultad. P’esey mes CBS ta tuma contacto cu nan, pero nan tambe ta tumando contacto cu e departamento aki.

Un punto cu ta produci pregunta cerca nan ta con ta wordo uza e number di parcela pa yen’e riba website. Ya cu no tur hende tin un number di parcela of no tur a haya esey riba recibo di WEB, ya cu nan ta benta e recibo afo, etc…

Tambe tin algun pregunta riba e cuestionario mes cu semper personal di CBS ta dispuesto pa contesta. E cuestionario a wordo haci mas cortico pa facilita e proceso aki. Esun cu no tin conocemento pa haci’e via online of si nan no tin internet, nan por tuma contacto cu nan helpdesk libremente.

Sinembargo el a adverti pa comunidad paga tino pasobra nan no ta descarta cu por tin hende cu mal intencion cu ta purba yama na nomber di CBS. Si un persona tin duda cu e persona cu a yama ta traha cu CBS, bo por tuma su nomber y tuma contact di biaha cu CBS pa verifica si en berdad e persona ey ta traha cu nan. “Pa evita cu hendenan ta mal uza e oportunidad aki,” directora interno di CBS a declara na Bon Dia Aruba.

Helder ta haci un yamado na comunidad pa haci nan esfuerso pa completa e cuestionario di Censo 2020. E no ta tuma hopi tempo y e ta facil pa contesta. E ta tuma alrededor di 10 minuut pa cada persona. Nan tin persona na linea di CBS helpdesk cu por contesta via telefon y/of Whatsaap: 5247444, caminda nan ta dispuesto pa contesta cualkier duda of pregunta cu bo por tin rond di Censo 2020