(AP) — Mas di mil beer Paddington y otro peluchi laga den tributo na e fayecido Reina Elizabeth II na Londres y Windsor ta bay wordo dona na un organisacion caritativo pa mucha, Palacio di Buckingham a bisa diasabra.
Ciudadanonan a laga miles di tributo, incluyendo flor y peluchi, pafo di Palacio di Buckingham y den parkenan real na London y pafo di Windsor Castle den un muestra di duelo despues cu e monarca cu reinado mas largo den historia Britanico a fayece dia 8 di september ultimo cu 96 aña di edad.
E reina a keda vincula cu beer Paddington, otro tesoro nacional Britanico, despues cu ambos a aparece hunto den un video comico cortico durante e celebracionnan di Jubilee di Platino anteriormente e aña aki pa marca e 70 aña di e monarca riba e trono. E video, cual a mustra e reina bebiendo te atardi cu un beer Paddington anima pa computer, a mustr’e bisando e beer cu e ta comparti su amor pa sandwich cu mermelada – y cu e ta gusta sconde nan den su tas “pa mas oro”.
Palacio di Buckingham y e parkenan real a bisa diasabra cu ta bay haci limpi e centenares di peluchi laga den tributo pa e reina profesionalmente prome cu entrega esakinan na Barnardo’s, un organisacion caritativo pa mucha. Elizabeth tabata patron di e caridad pa mas cu 30 aña, y na 2016 el a pasa e patronahe na Camilla, esposa di Rey Charles III y awo conoci como Reina Consorte.
“Nos ta honra di por duna hogar na e peluchinan cu hende a laga den su memoria”, segun Lynn Perry, hefe ehecutivo di Barnardo’s. “Nos ta priminti cu nos ta bay cuida e beernan aki cu ta bay ta bon stima y trece alegria na e muchanan cu nos ta sostene.”
