(NLTimes) – Centenares di studiante den nan prome aña lo cuminsa nan estudio den september sin un vivienda, segun union di studiante LSVb a bisa diahuebs.

“Aña pasa, esaki a bay completamente malo y e aña aki aparentemente ta pio,” LSVb su president Joram van Velzen a bisa. E cantidad di studiantenan den nan prome aña ta considerablemente hopi mas halto cu e cantidad di camanan disponibel actualmente.

Na Amsterdam, University of Amsterdam ta ofrece vivienda na mas o menos 3,000 studiante internacional den nan prome aña, sinembargo 4,500 studiante internacional a aplica y e periodo di aplicacion te ainda no a cera. Den juni, VU University Amsterdam a bisa cu tin 1,800 studiante cu a aplica mas cu e cantidad di camanan disponibel. Den Groningen, e institucionnan di educacion a bisa cu nan tin mester di mas o menos 260 cama, pero te cu awo solamente a logra yega na 111. Na Nijmegen, tin falta di mas o menos 165 cama pa studiantenan internacional.

Segun e union di studiante, algun institucion ta culpa e falta di cama aki riba e crisis di solicitante di asilo pa motibo cu camanan ta necesario pa e solicitantenan cu ta drumiendo fuera di e centro na Ter Apel. “Pero esaki ta solamente un parti di e causa,” Van Velzen a declara.

“Tambe e ta financieramente atractivo pa e institutonan di educacion atrae studiantenan internacional pa causa di con nan institucionnan ta ricibi fondo.” E sistema ta financia e institucionnan pa cada studiante cu nan registra, cual ta nifica cu mas studiante ta trece mas placa. “Esaki ta un incentivo pa trece mas studiante posibel aki, sin pensa tocante unda e studiantenan aki lo drumi,” Van Velzen a comenta.

Pa motibo aki entre otro, University of Amsterdam ta urgi studiantenan internacional pa no bay Hulanda si nan no tin vivienda. Amsterdam ta enfrentando un escasez severo di vivienda pa studiantenan. E situacion ta asina severo cu e universidad ta urgi e studiantenan internacional no bini e pais si nan no a haya vivienda te ainda. Un vocero di e universidad a conta NL Times cu un e-mail a ser manda pa e studiantenan den e lista di espera unda cu a conseha pa reconsidera nan plan pa bay Amsterdam si nan no haya vivienda pa mita di augustus.

E e-mail aki a ser manda pa motibo cu e universidad su lista di peticion pa acomodacion ta completamente yen. Studiantenan por haya nan mes den un situacion hopi tenso si nan yega Amsterdam sin caminda pa biba den medio di e crisis actual di vivienda. E universidad ta premira cu vivienda lo keda un problematica te hasta den e proximo aña academico. E vocero tambe a nota cu e apelacion na e studiantenan internacional aki sin vivienda ta den linea cu loke otro universidadnan na Hulanda tambe ta consehando. Luna pasa, Utrecht University a haci un apelacion similar.

UvA tin tempo caba ta purba pone un limite na e cantidad di studiantenan internacional cu nan por acepta. E politica nacional actual no ta permiti pone limite na hopi curso pa motibo cu e reglanan di Union Europeo ta permiti studiantenan cu ta ciudadano di e estadonan miembro biaha y studia libremente dentro di e Union Europeo, UvA a splica NL Times. “Dos aña pasa, nos a somete caba un proposicion pa cambia e ley aki na e Minister. Tempo cu e gabinete anterior a baha, pero e decision no a ser haci. Awo nos ta wardando un decision di e gabinete nobo,” e vocero a bisa na AT5.

Segun union di studiante na Amsterdam ASVA, 4,720 studiante internacional a registra pa ricibi acomodacion, sinembargo e Universidad tin solamente 2,416 camber disponibel. Esaki ta nifica cu 2,304 studiante te ainda no tin un vivienda.