(AFP)—Centenares di studiante y maestro na Indonesia a bira malo despues di come cuminda gratis na scol, director di nan scol a bisa diahuebs, e di dos caso grandi di intoxicacion alimentario e siman aki relaciona cu e programa principal di gobierno.
E programa di cuminda cu ta costa varios biyones di dollar, lansa na januari aña pasa, ta un di e politicanan principal di Presidente Prabowo Subianto. E programa a haya hopi critica pa su costo halto, cu centenares di hende protestando na Jakarta siman pasa y exigiendo pa kita e programa.
Por lo menos 725 alumno y 25 maestro na Rembang, riba Isla Java, a keha cu nan a sinti malo diahuebs mainta despues di come e cuminda gratis diaranson.
“Nan tabatin diarea, nan tabata sacando y nan tabata sinti nan mes malo. Tabatin un rij pa bañonan pasobra dos di nos toilet ta bou di renobacion,” director di e scol Juhartutik a bisa. Manera hopi Indones, e tin solamente un nomber.
El a bisa periodistanan cu personal di cushina a bisa cu a prepara e cuminda 3 or di mainta y a sirbie 12 or di merdia.
Un dokter na un centro di salud local, Joko Paryanto, a bisa cu 18 studiante y maestro mester a ser hiba pa tratamento, y tres di nan ainda ta hospitalisa.
E incidente a pasa apenas algun dia despues cu mas di 500 studiante na Sidoarjo, Java Oriental, a ser hiba hospital despues di come e cuminda gratis diamars.
E agencia nacional di nutricion, e organismo di gobierno encarga cu distribucion di e cumindanan gratis, a bisa diaranson cu por lo menos 80 studiante ainda tabata hospitalisa.
Desde cu e programa a cuminsa, el a keda afecta pa casonan masal di intoxicacion alimentario y acusacionnan di corupcion.
“Esaki ya a bira un alarma nacional. Dies miles di hende a bira victima desde cu a implementa e programa di cuminda gratis, y tur luna ta surgi un victima nobo,” Ubaid Matraji, investigador na Indonesian Education Monitoring Network, a bisa den un declaracion diahuebs.
“Gobierno no por sigui trata nan solamente como cifranan estadistico. Tras di cada cifra tin un mucha malo, un famia den panico y e fracaso di estado pa garantisa cuminda sigur.”
E programa di cuminda gratis tabatin como meta pa yega na por lo menos 82.9 miyon mucha, y tambe muhernan na estado y cu ta duna pecho, casi un tercera parti di poblacion di e pais.
Pero e programa tabata entre e prome partinan di presupuesto cu a keda reduci ora Jakarta a move pa contraresta e impacto economico di e guera den Medio Oriente.
Mas cu 20 porciento di muchanan na Indonesia ta afecta pa retraso den crecemento causa pa desnutricion severo.
