CEO di Disney, Bob Iger, a renuncia for di hunta di Apple, apenas algun luna prome cu ambos compania ta prepara pa lansa nan servicio independiente di streaming.

Iger a renuncia dia 10 di september ultimo, segun un documento entrega pa Apple na US Securities and Exchange Comission. Esey ta e mesun dia cu Apple a revela e fecha di lansamento y prijs di suscripcion pa Apple TV Plus, cual oficialmente a haci Apple y Disney competidonan.

Iger a uni hunta di Apple na 2011, pero e relacion di Apple cu Disney tabata existi di prome. Disney pa $7.4 biyon a cumpra Pixar, di cual ex- CEO Steve Jobs tabata accionista mayoritario na 2006. Iger tabata instrumental den e proceso di adkisicion.

Awo cu Disney y Apple ta cla pa enfrenta otro cu nan respectivo servicio di streaming, e separacion ta logico.

Salida di Iger for di hunta di Apple lo por recorda ora CEO di Google, Eric Schmidt a bandona hunta di Apple na 2009. Schmidt a uni na 2006, pero a retira na 2009 despues cu Android di Google a bira un competencia di e iPhone.

Disney+ y Apple TV Plus lo lansa 11 dia apart. Disney+ lo costa 6.99 pa luna ora e lansa dia 12 di november, of $12.99 cu Hulu (cu aviso) y ESPN+. Apple TV Plus lo lansa dia 1 di november pa $4.99, cu apenas nuebe titulo.