Departamento di Asunto Social den colaboracion cu ministerio di Asunto Social y Labor ta organisando un Congreso di Famia 2019. E lo tuma luga 22 september di 4pm- 8pm na Riu Palace, unda lo bin cu diferente topico relaciona famia.

Jesseline Kelly-Soto, Relacionista Publico di DAS a duna di conoce cu e congreso ta pa henter comunidad cu ta interesa pa haya informacion y hermentnan importante riba diferente tema relaciona cu famia.

Un tema cu lo wordo duna ta finanzas. Francis Groeneveld, coach certifica di finanzas den famia, ta splica cu e topico ta importante den e tempo cu ta bibando actualmente y pasobra un di causanan mas comun di divorcio ta pa problema financiero.

Ta bay elabora tocante tipo di finanzas cu ta presenta den famia, reto cu pareha of famia no ta atende cu finanzas debidamente. E lo duna tip pa con un famia por maneha nan economia hunto.

Pa pareha cu ta involucra nan yiu, e ta bisa cu hopi biaha e finanzas ta hunga un ‘rol importante riba e relacion ora ta trata di yiu of mayor’. Den caso cu nan mester cuida nan mayor cu a bira grandi di edad, anto con ta presupuesta pa progresa hunto manera famia. Of ora un yiu kier diferente cosnan, manera aparatonan electronico.

E a bisa cu hende mester realisa cu ta necesario pa pone atencion riba pagonan, con pa maneha esaki. Tambe pa wak con por sali for di debe y cuminsa prepara un futuro como pareha, yiunan y sernan keri.

Otro punto el a menciona cu den pareha por tin tentacion cu un kier gasta mas cu otro. “Nos lo papia di diferente tipo di persona cu tin den relacion, pa identifica kico por y asina e pareha por bay bon cu otro”, el a expresa. Con pa regla y balansa cu otro pa asina evita pleito of discusion ‘con pa discuti sanamente cu bo pareha den asunto di finanzas’.

Orador Helen Guda, trainer certifica den Disciplina consciente y Director di Develop To Grow, ta bisa cu e tin añanan trahando cu DAS pa duna training na mayor pa haya ayudo den educacion.

“Nos tur ta pasa den cambio, pero no tur ora nos sa con pa trata cu cambio. Nos comunidad a cambia, educacion manera nos a hay’e no ta sirbi pa nos yiunan mas. Awendia nos muchanan sa mas cu nos den tecnologia… ki ora ta bon pa bo yiu tin un iPad? Awendia mucha tin informacion y opinion, y con nos como mayor por handle cu esey? Ki cambio ta nifica pa nos como mayor y comunidad en general?”, Guda a splica ta preguntanan cu lo trata durante e congreso.

Lo tin mas orador cu lo papia durante anochi riba diferente topico, manera Ramon Todd Dandare cu lo papia di famia di antes y awo. Tambe problema di adiccion of malesa den famia.

E congreso lo ta pa edad 18+, pa esunnan cu kier registra por haci’e riba Facebook di DAS y yena formulario of subi riba website www.asuntosocial.aw pa Congreso di famia y registra. Tambe por yama 528-1100 Jesseline. E congreso ta gratis.

 

LEAVE A REPLY

Please enter your comment!
Please enter your name here