Presidente di STA, Diego de Cuba ta premira cu aña 2020 lo ta uno di hopi actividad sindical.

E aña aki ta habri pa STA cerando contracto colectivo (CAO) cu e compania grandi di construccion cu ta cay bou e paraplu di WAB. Nan ta companianan afilia di construccion, entre nan Albo, Thiel Corporation, Croon, Bohama, etc. E ceramento di CAO ta programa eventualmente pa e siman aki.

“Mi ta kere cu ta un bon comienso pa e sindicato y pa e companianan tambe,” el a declara na Bon Dia Aruba.

De Cuba a bisa cu aparte di e finalisacion di e negociacion di e CAO aki cu WAB, sindicato STA ta negoshando cu compania Hertz Car Rental y Dufry. Igualmente el a bisa cu STA lo ta na mesa negoshando CAO cu The Mill Resort y Triple A tambe.

Triple A y referendum.
Sindicalista De Cuba a bisa cu tabatin ‘turbulencia’ rond di e trahadonan di Triple A (Aeropuerto). Te hasta nan tin un referendum solicita. Pero -segun presidente di STA- ta e mesun Mediador di Gobierno durante un reunion cu gerencia di aeropuerto y STA a confirma ‘cu STA no tin nodi di bay referendum, y cu gerencia tin cu sinta cu sindicato cu STA pa negosha e departamentonan cu STA ta representa’.

A pesar di esaki, De Cuba a bisa cu STA lo bay pidi un referendum ‘pasobra nos kier bolter bek e situacion’. Ademas nan ta haya como sindicato cu di parti di nan miembronan na Triple A N.V., nan ta hayando mas miembro acerca y esaki ta motibo suficiente pa nan solicita e referendum.

Sinembargo De Cuba a bisa textualmente cu STA a solicita e referendum aki caba, ‘pero nos ta sinti cu Mediador tabata bastante terco den aña anterior pa convoca e referendum’. E no ta haya cual ta e motibo pa kico di esaki, pero como STA nan tin cu bisa cu e aña aki si ‘nos ta bini por la goma’ pa locual ta Triple A N.V

Negociacion N.V. Elmar.
Otro negociacion cu e ta considera importante ta esun di N.V. Elmar. De Cuba a bisa cu nan CAO ta vence na comienso di april proximo. Ya caba STA a cuminsa manda carta pa gerencia di e compania di utilidad aki pa cuminsa negosha lo mas pronto posibel of por lo menos pone e fechanan pa cuminsa cu e proceso di negociacion di e contract colectivo di nan trahadonan.

“Mi tin cu bisa cu no ta bay ta un negociacion facil,” el a declara. E ta haya cu e negociacion aki lo bay ta bastante dificil pasobra ya caba STA a sinti e problema cu tabatin anteriormente.

P’esey e lider di e sindicato aki ta premira cu ta bay ta un negociacion bastante fuerte. “Aunke mi tin di bisa cu e gerencia actual bou Sr. Koolman ta uno ‘hopi habri’ y dispuesto pa scucha y nan di STA ta habri tambe.” Nan lo pone tur carta riba mesa y STA ta spera cu gerencia di N.V. Elmar lo haci mesun cos, pa nan por bin cla cu e negociacion di un CAO nobo den un tempo relativamente corto.

 

LEAVE A REPLY

Please enter your comment!
Please enter your name here