Colegio di supervision financiero di Corsou y Sint Maarten (Cft), den combersacion cu Minister di Finansa di Sint Maarten, a constata cu Sint Maarten ta tumando pasonan padilanti den mehoracion di e proceso presupuestario.
Conseho di Minister di Reino (RMR) a pidi Sint Maarten pa aproba e presupuesto di 2023 prome cu dia 31 di maart 2023. E presupuesto aki mester cumpli cu e normanan presupuestario fiha den e Ley di Reino di supervision financiero di Corsou y Sint Maarten (Rft).
Segun Rft, mester a aproba e presupuesto di 2023 prome cu dia 15 di december 2022. Sint Maarten no a logra cumpli cu e fecha limite ey y a indica cu lo entrega e presupuesto di 2023 na Parlamento mas lihe posibel, pa por aproba esaki prome cu e fecha limite di dia 31 di maart 2023 manera pidi pa RMR.
Inversion
E nivel di inversion publico di Sint Maarten ta abou pa basta tempo caba. Door di esey Sint Maarten ta perdiendo oportunidad pa stimula desaroyo economico sostenibel. Den 2022 Sint Maarten tabatin planea pa financia ANG 15 miyon na inversion pa medio di registracion coriente di Hulanda. Door cu Sint Maarten, den e modificacion di presupuesto aproba pa 2022, a registra un deficit significativamente mas halto cu locual RMR ta permiti, Cft no por a duna conseho positivo riba e peticion pa prestamo. Gobierno ta trahando actualmente riba un hustificacion adecuado di e inversionnan den e presupuesto di 2023.
Cuido y seguridad social
Den 2022 Sint Maarten a tuma e prome pasonan pa reduci e deficitnan den e fondonan di cuido. Asina, entrante dia 1e. di september 2022 a hisa e limite salarial pa Seguro Medico y Seguro di Accidente, y Sint Maarten a cuminsa cu un programa di economisacion riba gasto di remedi. CFT a delibera cu Conseho di Minister y cu Organo Ehecutivo di Seguro Social y Seguro di Gasto Medico riba e reformanan proponi y riba e importancia di un presupuesto (plurianual) di e fondonan social realistico y adecuadamente funda. Cu introduccion di un Seguro Medico General entrante dia 1e. di januari 2024 Sint Maarten ta spera di reduci e deficitnan di e fondonan di cuido structuralmente.
Aumento di entrada di impuesto
Carga di impuesto y di prima di Sint Maarten, cu mas o menos 27 porciento di e Producto Interno Bruto (PIB), ta abou segun normanan internacional. Cft ta recomenda Sint Maarten pa introduci, na corto plaso, un impuesto di casino y un impuesto riba volumen di benta riba importacion di mercancia door di persona particular. Sint Maarten ta trahando caba riba un reforma di impuesto di alohamento pa huur di vivienda na turista. Tambe Sint Maarten kier introduci impuesto y prima riba punto di benta di loteria. Durante e combersacion cu Minister di Finansa Cft a enfatisa cu modernisacion di e sistema fiscal y di Departamento di Impuesto ta necesario pa mehora cumplimento. E intercambio y acoplamento di (archivo di) dato entre e organisacionnan ehecutivo ta di gran importancia den esey.
Maneho financiero
Den e utimo lunanan Sint Maarten a revisa varios proceso di trabou financiero y a sanea varios cuenta (intermedio). A aproba e cuentanan anual di 2019 y 2020 na januari 2023. Cu esaki a logra recupera pa gran parti e atraso relaciona cu preparacion y aprobacion di e cuentanan anual. Ta spera aprobacion di e cuenta anual di 2021 na termino cortico. Tambe Sint Maarten ta trahando pa haci e proceso di entrega y control di e cuentanan anual mas cortico. Cft ta enfatisa riba importancia di un implementacion sostenibel di e mehoracionnan procedente di e proyectonan pa mehora calidad di maneho financiero structuralmente. Pa logra esey ta importante pa tin suficiente capacidad.
Entrante dia 1e. di februari 2023 a nombra señora Lidewijde Ongering presidente di Colegio di supervision financiero di Corsou y Sint Maarten, Colegio di supervision financiero di Aruba y Colegio di supervision financiero di Boneiro, Sint Eustatius y Saba. Den su constelacion nobo Cft a haci un bishita na Sint Maarten dia 15 y dia 16 di februari 2023 y a hiba combersacion cu Gobernador, Conseho di Minister, Minister di Finansa y Parlamento di Sint Maarten. Tambe Cft a papia cu Organo Ehecutivo di Seguro Social y Seguro di Gasto Medico y director di Princess Juliana International Airport.
Dia 13 di februari 2023 Colegio di supervision financiero di Boneiro, Sint Eustatius y Saba (Cft BES) a haci un bishita na Saba, unda a hiba combersacion cu Colegio Ehecutivo y Conseho Insular y a haci un bishita na e luga unda ta construyendo e haf nobo. Dia 14 di februari 2023 Cft a hiba combersacion na Sint Eustatius cu Colegio Ehecutivo y a haya un recorido na e terminal di Global Terminal Investments Statia.
