Diahuebs 15 di September, Museo Arkeologico Nacional Aruba a inicia nan serie di charla cu ta bay bira un ciclo di diferente lectura pa brinda informacion tocante nos herencia arkeologico cultural subacuatico. Esaki a haya un tremendo acogida di comunidad.

Diferente hende y instancia a join e charla aki, cual tabata uno bastante interesante revelando e comienso di un serie di informacion cu lo wordo brinda na nos comunidad cu un balor hopi grandi pa desaroyo di nos cultura.

Drs. Raymundo Dijkhoff, hefe di e seccion di investigacion y coleccion di Museo Arkeologico Nacional Aruba a haci e presentacion aki, bisando: “Mi ta hopi contento cu e acogida tabata hopi positivo y cu e interes ta hopi grandi.” E ta agrega cu te ultimo, na final di e presentacion, a bini hopi pregunta y remarca cual ta nifica cu por sigui bay hopi mas largo. Esaki ta simplemente un teaser pa loke ta bay bin. “Tin hopi mas informacion,” Sr. Dijkhoff ta bisa, “pa mi tabata bon pa wak con e sentimento tabata ta den e publico y e tabata hopi positivo.”

Esaki ta un ciclo di charla, unda cu luna pasa un Master Degree Student, Gendra Lacle a duna e prome partinan den loke e ta studiando aworaki den contexto di e parti sub acuatico. Otro aña Gendra lo tin cu gradua anto Aruba lo tin su propio arkeologo sub acuatico. Otro luna, lo tin un siguiente charla cu ta bay ta tratando e investigacion cu a haci na November, unda a haya 27 sitio sub acuatico. Alabes ta bay splica un tiki mas riba contenido di e tratado di UNESCO 2001, pa tur hende compronde cu tur e entusiasmo mira awe cu nos tur tin cu contribui hunto pa e causa mas grandi. “Unabes cu bo wak con hopi Aruba tin di conta di pasado y rikesa cu nos tin, mi ta sigur cu poco poco e ta bay engrandece. Ta bay tin hopi mas lectura, pero pa e aña aki nos ta wardando pa e ratificacion [di e tratado di UNESCO] bin despues di October, e ora nos lo tuma nos siguiente pasonan publicamente,” segun Sr. Dijkhoff.

Fundacion Parke Nacional Aruba ta forma parti manera un di e stakeholders di e parti arkeologico maritimo cu museo arkeologico ta organisando y purba compila informacion di dje.

Norman Kuiperi, director interino na Fundacion Parke Nacional Aruba, ta bisa reportero di Bon Dia Aruba cu el a haya hopi bunita cu hopi hende a bini presencia e presentacion aki. “Esaki ta yuda conscientisa hende riba kico ta envolvi pa por proteha nos herencia y duna un storia cultural mas corecto mañan pa e studiantenan,” Sr. Kuiperi ta expresa. Tabatin un cabayero den e audiencia cu tabata puntra unda por haya informacion, pasobra e ta traha den sector turistico anto e cosnan aki ta trece hopi mas balor na e producto Aruba. Si esaki no ta bon organisa, bo ta haya bo mes cu problema cu ta comparti informacion robes anto esaki ta sigui bay haya su bida.

 

‘ROPV a wordo verzwak y mester haci adaptacion’
Durante e lectura, por a scucha un rato unda a haci referencia na e ROPV y con esaki ta hinca den otro pa loke ta proteccion di nos areanan natural, cual ta cay man den man cu conservacion di nos cultura y herencia tambe, cu tur e trabaonan cu Museo ta haci y varios otro instancia.

Reportero di Bon Dia Aruba a puntra Sr. Kuiperi su reaccion riba e parti aki, cual e ta di opinion cu tin simplemente un critica cu e ta haya mester wordo subraya.

E ROPV a wordo ratifica den Staten na 2019, y Sr. Kuiperi ta bisa cu e parti unda nan a cambie unda na final di dia e minister tin e derecho di cambia un regla den dje. “Esey ta debilita e ROPV completamente.” Sr. Kuiperi ta agrega cu e idea ta pa proteha loke bo tin eyfo, ta expertonan y hendenan cu a studia hopi aña largo a yega na traha riba e documento ey. “Pica ta cu door di a pone cu e minister tin e derecho di por cambia e destinacion di un area cu ta proteha den e ROPV, pa mi el a debilita henter e ROPV completamente.” Por drecha esaki door di simplemente kita e punto aki cu a wordo agrega. “E no tabata aden, kiermen pa mi nan mester saca esaki afo si nan kier proteha Aruba,” sr. Kuiperi ta expresa.

E siguiente charla lo tuma luga 27 di October na Museo Arkeologico Nacional Aruba pa mesun ora, 7:30pm pa 9:00pm den auditorium.

LEAVE A REPLY

Please enter your comment!
Please enter your name here