Recientemente tabata tuma lugar varios reunion informativo den e barionan cu por keda afecta pa pasada di un tubo nobo, e biaha aki di gas natural pa WEB. Esey no mester aprecia ni elogia, e ta un obligacion gubernamental y di e compania cu ta bay realiza e proyecto. Pero, ta bon cu nan a cumpli. Nos no sa si en berdad tur detaye importante a bin dilanti, pero esey nos lo ripara despues.

Sin embargo, parce cu a ‘lubida’ un partner hopi importante den e asunto aki: Marinierskazerne. E actual tuberia cu tabata construi na inicio di añanan 60 di siglo pasa, ta core pasa den nan tereno. E tempo aya no a haci problema di esaki, realmente henter comunidad e tempo ey, mescos cu resto di mundo, no tabata pone atencion na posible peligro di un instalacion asina. Ademas, e tubonan no tabata pa gas y ta presenta menos peligro. Prueba di esaki ta cu nunca a sucede algo grave, aunke nos no sa si esey ta fruto di bon vigilancia y cuido di e tubonan.

En todo caso, for di inicio aña pasa Bon Dia Aruba a señala cu e biaha aki e situacion di e tuberia riba tereno di kazerne lo ta otro, pasobra ta trata di otro tipo di material cu ta pasa aden, y nos ta den otro epoca, unda tin hopi mas atencion pa e peligronan ambiental y humano cu por ta envolvi. Esey a conduci na december 2021 na un entrevista cu e comandante di Mariniers di e momento ey, cu a declara di desea di sinta na mesa tocante e topico, pero cu e ta keda pendiente di tal consulta.

Awor, y por lesa e detayenan den un entrevista cu e responsable di Mariniers pa e asunto aki den e edicion aki, cu te awe e dirigencia di e base militar no a haya e consulta cu nan ta considera necesario pa atende e asunto aki na e manera debido. Y ta dificil di kita nan razon, pasobra ta trata di un lugar special, unda tin explosivo almacena y unda tin ehercicio ta tuma lugar cu arma di candela. Awor, na ningun momento, ni den e entrevista di december 2021, ni den esun actual, e entidad militar a bisa cu nan tin obhecion contra e proyecto. Henter e asunto ta cu, mescos cu publico en general, nan tambe ta lesa den medionan kico lo ta e proposito. Es decir, cu mientras ta crea e imagen den publicidad cu practicamente tur cos ta cla pa inicia e proyecto, y cu talvez por tene cuenta cu algun observacion o comentario, pero cu por lo demas, nan ta cla.

Awor ta bin resulta cu no a discuti e asunto aki nunca cu e entidad cu tin e obligacion di atende e asunto aki na un manera debido, no solamente for di e interesnan genuino di forza arma Hulandes, pues nos forza arma tambe, sino tambe for di interes di comunidad di Aruba, pa por conta cu un situacion di absoluto seguridad den e asunto aki. Un posible peligro y subsiguiente desastre no ta pa e cuerpo militar so, sino pa nos mes tambe. Mirando e asunto di e angulo aki mester bisa cu no ta nada menos cu un gran falta di respet pa atende e asunto asina. Y sigur si entre december 2021 y awe, e medio aki a publica opinion di e ministro encarga cu energia, cu a declara dia 14 di juni 2022 cu lo tabatin un consulta cu Marinierskazerne. Esey plenamente no ta berdad. Nos por imagina cu e mandatario lo desea di sconde tras di lomba di e compania y e departamentonan concerni, pero esey no ta un ponencia satisfactorio. Esaki ta un asunto cu mester discuti na e nivel mas halto gubernamental, tanto na Aruba como na Hulanda. Y esey, por si acaso e mandatario concerni no ta na altura, ta un asunto cu e mes y su colega di asunto general mester atende. Y por constata cu yegando na casi un aña cu ta andando cu e asunto aki, e consulta ey no a tuma lugar.

Como agravante den henter e asunto aki, ta scucha e argumentonan idiota di e compania cu e tuberia aki no ta mas peligroso cu e tubo di bo boter di gas te bo cushina. Realidad ta cu tabatin suficiente accidente grandi na Merca e.o. cu a costa bida di hopi hende, hustamente pa falta di mantencion debido di tuberia… No ta muestra di seriedad si un compania ta bin cu e tipo di argumento aki y ta mal señal pa comunidad si ta na e nivel aki nan ta pensa.

Kico ta realmente e problema cu nos ta topa aki atrobe? Cu nos gobierno(nan) ta pone mas atencion na ‘get the job done’ den pura, sin tene cuenta cu tur aspecto y atende esakinan adecuadamente ora e situacion ta requeri esey. Y den e caso aki, unda tin un situacion nobo cu tuberia cu peligro di explosion, mester a atende e asunto como tal y por bisa awor cu esey no ta e caso. Ademas, si hasta e ministro encarga cu energia ta bisa cu e no conoce e contrato cu e compania, kico ta e problemanan huridico si resulta cu no por pasa e tuberia riba tereno di Kazerne? Nos lo tin un caso ‘tipo Racetrack’ atrobe? Pone tubo a resulta den tira nos un tubo…?

LEAVE A REPLY

Please enter your comment!
Please enter your name here