Diamars ultimo Chile a supera e miyon di persona vacuna contra Covid-19, seis dia despues di cuminsa e proceso di inmunisacion masivo cu hende grandi, ken a uni na personal medico cu ta wordo vacuna caba for di december, Ministerio di Salud a informa.
E pais a logra vacuna un total di 1.025.580 persona, entre e cual 376.519 ta mayor di 78 aña cu desde haci seis dia a cuminsa e proceso di vacunacion masivo danki na adkisicion di cuatro miyones dosis di e laboratorio Chines Sinovac, Ministerio di Salud a informa.
“Awe nos ta supera e miyon persona vacuna. Nos tin un miyon di rason, e mayoria di nan hende grandi, pa nos ta contento” e presidente Piñera a resalta riba e red social Twitter.
Chile a logra supera 550.000 vacuna diasabra ultimo.
E meta di gobierno ta pa vacuna cinco miyon persona pa final di maart y yega entre 15 pa 18 miyon na juli di 2021.
E proceso a wordo realisa rapidamente y diamars ultimo a wordo vacuna 222.070 persona so entre hende grandi, trahadonan cu funcion na servicio esencial y basico di Estado, personal di boticanan, laboratorio, ademas di miembronan di Forsa Arma y di Polis cu a wordo desplega pa atende e pandemia.
Chile a cuminsa vacuna su personal sanitario na december, ora a ricibi un prome lote di 154.000 dosis di vacuna Pfizer/BioNTech contra coronavirus, cu a contagia mas di 758.000 persona y a supera 19.000 fayecido na e pais.
Na e proceso di vacunacion a uni e isla di Pascua, e teritorio turistico ubica den mey di Ocean Pacifico na 3.700 kilometer di Chile, na unda den e prome jornada a vacuna 120 persona despues di e yegada di e prome lote di dosis.
Autoridadnan di e isla a indica cu nan no ta registra caso positivo di Covid-19 desde haci mas di 300 dia debi na cu entrada pa turistanan ta cera.
