Aruba Trade and Industry Association (ATIA) tin e placer di presenta su director nobo, den persona di Señor Herrick E. Henriquez. Señor Henriquez lo drenta den su funcion como director entrante 1 di maart 2021.
Segun un comunicado di prensa, como Director, Herrick lo pone tur su conocemento y experticio na disposicion y interes di nos miembronan y tambe comercio di Aruba en general.
Herrick, lo consolida y sigui construi ariba ATIA su trayectoria solido pa salvaguardia interes di comercio di Aruba, desaroyando lasonan estrecho cu comerciantenan, empresanan y cu Gobierno di Aruba.
Herrick, ta bon conoci den nos comunidad pa ta envolvi den organisa diferente evento exitosamente, cual hunto cu su trayectoria profesional y experticio a yud’e crea un red empresarial y social remarcabel tanto local y internacional.
Prome cu Herrick a join ATIA, Herrick a ocupa e funcion di Senior Examiner Prudential Supervision na Banco Central di Aruba pa 7 aña, anteriormente e a ocupa e posicion di Assistant Manager Assurance, na un di e companianan renombra di accounting na Aruba.
Hunta di supervision di ATIA ta contento pa apunta Herrick como ATIA su director nobo, y tin tur e confiansa cu Herrick su experiencia conhuntamente cu su habilidad pa identifica oportunidad y conocemento di comercio lo sigui fortalece y diversifica ATIA y asina logra un futuro emocionante den e normal nobo.
