November ultimo, cientifico He Jiankui a ricibi atencion internacional ora el a anuncia cu a uza e herment di edicion genetico, CRISPR/Cas-9 pa altera dos embryo.
El a insisti cu e alteracion lo proteha e embryonan di infeccion cu HIV den nan bida, maske otro expertonan a bisa cu e edicion tabatin fayo, y lo por pone e babynan den riesgo di problema di salud den futuro.
A pesar cu He a presenta e resultadonan riba e rumannan morocho Lulu y Nana na un conferencia di genetica na Hong Kong, e no a revela tur su data, publica su resultadonan den un publicacion academico, of duna prueba definitivo cu e experimento a tuma luga. Bioethicistanan, geneticistanan, y otro cientificonan Chines tabata hororisa pa e noticia, y rumornan a circula cu He a disparce, of a wordo poni bou aresto.
Awo, un investigacion preliminar di autoridadnan den e provincia di Guangdong (unda e cientifico ta traha) ta confirma e nacemento, y ta declara cu He ‘a desafia prohibicionnan gubernamental y a conduci e investigacion den buskeda di ganashi y fama personal’, segun Xinhua, e corant estatal Chino. E reporte ta mustra un cientifico su so, kende a recauda fondonan riba su mes, a falsifica documentonan di revision etico, y mas probablemente lo enfrenta cargonan serio. E investigacion di He a wordo para pa gobierno Chines luna pasa, y desde e momento ey a wordo despedi di e Universidad Sur di Ciencia y Tecnologia. Lulu y Nana lo wordo poni bou observacion medico.
Ainda no ta conoci precies ki cargonan He lo enfrenta, si e edicion genetico den e di dos embaraso tabata relaciona cu HIV, of kico lo pasa cu e di dos embaraso. Sinembargo, e caso a cuminsa un discusion amplio tocante e reglanan na China pa e tipo di investigacion biomedico aki. Na november, e ex- vice minister di salud, Huang Jiefu, a sugeri cu e pais lo mester establece un organisacion pa vigila experimentonan medico.
Mientras tanto, Wang Yue, un investigado di ley di salud na Peking University, a bisa The New York Times cu, pasobra tradicionalmente ‘e responsabilidad legal no ta cla, y e castigonan ta hopi liviano’, China mester enforsa regulacionnan mas estricto.
