Parlamentario Mike de Meza(AVP): ‘Xiomara Ruiz no ta capaz pa e funcion di minister di Financia’

ORANJESTAD – “No ta un biaha esaki a pasa, pero ta birando di mas awor, cada biaha atrobe ta minister presidente mester bula aden y scap’e di mas blunder. Ta ora pa haci algo y hinca Financia di nos pais den man di hende capaz, cu curashi y conocemento di e materia”, asina ing.

Mike de Meza di Fraccion di AVP den Parlamento a anuncia den fin di siman. E ta lamenta cu un ley cu e mesun fraccion di MEP a pasa desde mei 2018, awor e mesun minister di Financia no por ehecuta. Pakico a pasa e ley anto for di e prome dia, cu intencion pa tuma medida contra 10 mil pensionado?

Mike de Meza a ocupa e funcion di minister di Financia den gabinete Mike Eman I y no por caba di compronde con minister presidente Wever-Croes ta permiti pa minister Ruiz por comete tanto fayo y laga cara financiero di nos pais na suela den exterior. No mas cu e siman aki atrobe tin organisacionnan internacional na Aruba, specificamente pa controla instancianan local cu ta resorta bou di e mesun ministerio di Financia. For di Hulanda ta drentando señalnan cu ta prefera papia cu Minister President riba asuntonan financiero cu e minister di Financia mes. Hopi biaha e mes no ta presenta na reunionnan tampoco y ta manda ex minister di Financia pa represent’e. Den su ministerio e personal no tin confiansa mas den dje y por lo menos dos a tuma retiro recientemente y a opta pa bay bek nan departamento mirando cu eyden no tin un vision y pio un mision.

Ta parce cu e eror di kita Reparatietoeslag di pensionadonan a bira un pilder masha grandi pa pueblo absorba y MEP a haya presion di tur banda. A tende cu tin manifestacionnan na caminda y cu nan propio hendenan ta na cabes di e intencionnan aki, pa mustra gobierno cu nan ta “fout bezig”. Pero tur esaki ta sosodiendo bou e maneho sin rumbo y sin conocemento di minister Xiomara Ruiz.

Gobierno a pasa un ley na luna di mei 2018 den parlamento relaciona cu medida contra pensionadonan, hunto cu tur e medidanan di aumento di BBO, etc. cu mester a drenta na vigor dia 1 di juli 2018 un parti y dia 1 di januari 2019 e otro parti. Ora a yega momento pa implementa e prome set di medidanan, gobierno a hala atras y no por a “bende politicamente” cu lo duna algun pensionado e 25 florin extra y otronan no lo hay’e. E ora a opta pa duna tur pensionado e mesun 25 florin riba e 100 florin cu gabinete Mike Eman a duna nan caba na 2011 y 2013.

Awor cu mester implementa e di dos parti di e ley cu Gobierno a pasa aña pasa, atrobe minister Xiomara Ruiz a hay’e cu dificultad pa cumpli cu su mesun ley y atrobe el a hala atras. Den e di dos parti aki, Gobierno kier a kita e 125 florin di tur cu tin un otro entrada banda di nan pensioen di biehes. Cu esaki nan lo kier a baha gasto di Gobierno y cumpli cu deseonan di CAft.

Kico esaki ta nifica awor? Mas bien e presupuesto 2019 cu e coalicion MEP-POR-RED a pasa na december ultimo den Parlamento no ta bon mas pasobra falta como 11 miyon florin pa por cumpli cu e decision tuma na ultimo momento. Claro cu awor e mesun Minister Ruiz lo hay’e bou presion di Hulanda, di CAft, di IMF y tur otro organisacion cu ta supervisando su maneho financiero. E forma di traha aki ta duna tur menos confiansa den su capacidad di maneha financia di nos pais y pio ainda, e capacidad di e Gabinete completo pa por tene nan mes na ley.

“Mi kier bisa cu nos Fraccion tabata contra kitamento di Reparatietoeslag pa pensionadonan. Pa dos motibo. E prome pasobra ta nos a bin cu ne y pa di dos; nos no ta na fabor di kita di e grandinan pa duna compinchinan den bestuurskantoor”, asina Mike de Meza a aclaria. E parlamentario tin keho pisa pa e forma con e gobierno aki ta introduciendo medidanan tras di otro contra pueblo y di otro banda ta mira tur dia con ta sigui emplea mas hende den e aparato gubernamental y den nan oficina como coordinador. E ex- minister di Financia a sigura cu esaki tambe ta responsabilidad di e minister di Financia actual pero ta mas cu bisto cu su mesun coleganan no ta respet’e, su minister presidente ta “by pass” e constantemente pa evita cu e ta haci mas fout, dor di no envolvi su mesun departamentonan den su decisionnan.

“Pa mi yuda minister Ruiz mi kier bis’e, no bin busca placa cerca pueblo y pio cerca pensionadonan. Check rond di Bo mes, cuanto ex minister cu pensioen di minister bo tin trahando eyden cu awor ta costa nos pueblo miles di florin pa luna. Cuanto hende boso a emplea. CAft ta bisa cu Boso a subi boso gastonan cu 100 miyon florin aña pasa y awor cu ki cara bo kier bin cobra pueblo? Mi ta adverti minister Ruiz adelanta, si Bo tin pensa di bin saca e 11 miyon extra cu Bo no a lora kita di e pensionadonan, anto lo Bo topa cu nos para dilanti Bestuurskantoor. Bay baha Bo gastonan di personal, stop Ministernan di biaha pa loco y cera contractnan lucrativo pa yuda nan mesun amigonan, prome cu bin tuma mas medida”, asina parlamentario Ing. Mike de Meza a termina bisando.

You May Also Like

‘Kibra contracto di edificionan den Vondellaan y ta baha gastonan mas ainda’

Parlamentario Arthur Dowers den e conferencia di fraccion di AVP a papia riba e ...

AVP no tin un rol den formacion di gobierno nobo

Ayera un tiki pasa di 1or di atardi, minister presidente demisionario y lider di ...

‘Semper nos a scucha y traha pa pueblo’

Durante e encuentro politico cu AVP a tene na Angochi tabata presente diferente candidato ...

Oracion na Kapel di Madiki pa Marko Espinoza

Durante servicio di Misa na Kapel di Madiki Diasabra anochi, un multitud grandi di ...

‘E proyecto Green Corridor ta costa 300 miyon y tin como 500 fayo cometi’

Parlamentario Marisol Lopez Tromp ( POR): Lider di fraccion di POR den parlamento, Marisol ...

‘Tratado di Estambul contra tur sorto di violencia ta demanda compromiso politico na Aruba’

Parlamentario Jennifer Arends-Reyes (AVP) a expresa su palabra di  convivencia y condolencia  cu e ...