Un temblor nort di Iran a mata 5 persona y laga centenares herida, cu magnitud di 5.9 na provincia na East Azerbaijan, según a informa Seismological Center.
Mayoria di e heridonan a resulta den avalancha di hende cu a cuminsa core. Iran ta haya actividad di temblor frecuente.
Ademas di cobra bida di cinco persona, e temblor a herida 312 persona – maske unicamente un decena of mas di nan a rekeri tratamento medico na hospital.
“A hiba ekipo di rescate y helicopter den area afecta pa e temblor y hospital den area ta den alerta total pa yuda persona herida”, hefe di servicio medico di emergencia di Iran, Pirhossein Kolivand a bisa.
Television estatal IRINN a bisa cu mayoria di herido ta pa motibo cu hende a cuminsa core for di nan cas pa subi caya cu panico. Tambe a bisa cu 30 cas a wordo destrui cerca di e centro di e temblor.
Servicio di emergencia ta distribui kit di sobrevivencia, manera pa cushina, tent y material. Segun servicio di Geologico di Merca, e temblor tabatin un profundidad di 10km, aunke e centro sismologico di Iran a bisa cu tabata profundidad di 8km. Temblor cu menos profundidad tin mas probabilidad di causa un daño mas grandi.
Na 2003, un temblor di magnitud 6.6 a destrui e ciudad historico di Bam, matando 26.000 persona. Na 2017 un temblor di magnitud 7 a afecta region di frontera di Iran y Irak, matando 600 persona y heridando 9.000.
