Hoben Activo, Hoben Feliz ta un proyecto piloto cu a inicia aña pasa den bario di San Nicolas , y despues di a duna resultado positivo, a dicidi di expande pa bario di Dakota y pronto lo ta den Noord.

Hoben Activo Hoben Feliz ta un proyecto nobo di Ministerio di Deporte conhuntamente cu IBiSA, cu a cuminsa aña escolar 2018-2019 den bario di San Nicolas como un proyecto piloto. Segun un comunicado di gobierno, e resultadonan di e proyecto Hoben Activo Hoben Feliz tabata sumamente positivo, pues a dicidi di expande pa bario di Dakota na YMCA y pronto lo ta den Noord. E idea ta pa tur bario conoce e programa di Hoben Activo Hoben Feliz.

Kico ta Hoben Activo Hoben Feliz?
E programa Hoben Activo Hoben Feliz ta caminda muchanan por yega na un luga safe den bario pa practica deporte na un manera sano. Cada dos siman e programa ta introduci un deporte nobo. E lesnan ta completamente gratis y ta wordo duna parti atardi despues di scol cuminsando for di 3or di atardi y ta termina 4:30. Na SportCentrum San Nicolas lesnan ta ariba dialuna cu diaranson y na Dakota YMCA ariba tur diamars cu diahuebs. Registracion no ta necesario, pero si ta desea mas informacion por yama semper oficinanan di IBiSA na 582-4987 of 584-8903.

Pakico e programa di Hoben Activo Hoben Feliz ta importante?
E programa aki ta trece diferente solucion cu ta beneficiario pa un mucha y cu ta facilita tambe e mayornan. Haci ehercicio ta hopi importante pa un mucha su desaroyo. Come saludabel y haci ehercicio ta entre otro:

  • Yuda muchanan hiba un bida activo
  • Kita muchanan for di caya
  • Preveni cu muchanan ta bira adicto na gaming
  • Yuda e muchanan desaroya nan habilidadnan social

Tambe hopi biaha tin mayornan cu no sa ki deporte nan yiu lo gusta of ta bon den dje. Naturalmente, mayornan no tin e tempo pa try out diferente deporte te ora nan logra haya esun cu nan yiunan gusta. Pa es motibo e programa di Hoben Activo Hoben Feliz ta uno cu por facilita e mayornan paso tin diferente deporte cu nan yiunan por participa na dje y ta completamente gratis.

Oportunidad pa join un federacion Deportivo.
E programa di Hoben Activo Hoben Feliz ta duna e muchanan un base amplio di introduccion pa cu un deporte. Na final di cada dos siman cu e programa Hoben Activo Hoben Feliz termina cu un deporte, e muchanan por continua cu e deporte si nan gusta den nan mesun bario. Cada deporte tin un duracion di dos siman. E programa di Hoben Activo Hoben Feliz ta wordo coordina pa IBiSA caminda instructornan di federacionnan den bario ta bin duna les.

‘Healthy Movement’ pa yuda reduci gastonan di AZV.
Bon nutricion combina cu suficiente actividad fisico ta dos di e facetanan di un estilo di bida saludabel y activo cu ta yuda un persona logra un bon salud den transcurso di su bida. Manera medionan di comunicacion caba a menciona den pasado, Oduber kier conscientisa comunidad ariba e importancia pa hiba un bida saludabel. Como parti di su vision, Ministerio di Salubridad Publico y Deporte ta hiba un maneho cu ta den cuadro di e plan nacional di prevencion di salud.

Oduber a menciona cu e ta di sumamente importancia pa garantisa un fondo sostenibel di AZV. Segun cifranan, 80% di nos comunidad ta sobre peso di cual 30% ta obeso. Cifranan di personanan diabetico tambe ta halto. Anualmente AZV tin un gasto di 20 miyon florin door di dialyse solamente, esaki ta procedente di pashentnan cu ta sufri di sucu. P’esey mes ta bay bin cu mas campañanan di conscientisacion pa haci ehercicio y asina cambia nos estilo di biba.

Hoben Activo Hoben Feliz ta e prome proyecto deportivo pa hobennan cu Oduber ta realisa cu meta pa muchanan den bario topa otro na un forma sano door di practica deporte.

Na mesun momento, Oduber kier invita e muchanan di San Nicolas y Dakota pa bin participa na a programa aki y disfruta di diferente deportenan sano y ta gradici IBiSA pa nan bon cooperacion den e proyecto aki.

Like e pagina di Facebook di Minister Dangui Oduber y IBiSA pa keda al tanto cu e proyecto aki di Hoben Activo Hoben Feliz.

 

LEAVE A REPLY

Please enter your comment!
Please enter your name here