Ciudadanonan cu a firma contracto cu Serlimar, ta demanda compania

Diferente consumido kende a firma un contracto cu Serlimar for di 2015 pa cancelacion di servicio di recogemento di desperdicio, ta demanda e compania awor.

Segun nan Serlimar mes a distribui e contracto aki tempo cu a liberalisa e recogemento di sushi. Esaki a pasa na momento cu introduci e tarifa di 27,50 Afl. pa e recogemento. E tempo ey un gran grupo di consumido a dicidi di scoge un otro compania pa recogemento di sushi en bes di keda cu Serlimar. Entre nan basta a bira cliente cerca Ecotech pa motibo di un miho servicio y tambe pa motibo cu a priminti di procesa e sushi den un forma mas miho pa medio ambiente (Ecogas). Esaki como cu Serlimar no tabata actua segun ley ta bisa, esta cu nan mester procesa e sushi den un forma sostenibel.

Diabierna ultimo gobierno a anuncia cu a logra un acuerdo cu e sindicatonan riba e introduccion di tarifanan social y cu ya for di 1 di juli lo drenta na vigor. No tabata Serlimar como compania separa di gobierno cu a anuncia e tarifanan aki, cual ta remarcabel. Como cu den ley ta para clave cu ta Serlimar encarga cu e parti di fiha un suma pa recogemento y procesa sushi.

 Servicio di cliente Serlimar no sa nada
Ora di yama Serlimar diasabra, e servicio pa cliente tampoco por a duna informacion. E trahado na liña a indica cu pa nan e anuncio tambe ta un ‘baño friu’ y cu awor cu management di Serlimar ta evaluando pa wak con lo deal cu e cambio. E servicio di cliente ta indica cu e compania mes no ta prepara pa e cambio y ta avisa pa clientenan keda pendiente.

Paga dobel
Despues e anuncio diabierna, un ola di critica a lanta den comunidad. Minister di Medio Ambiente Otmar Oduber (POR)  defende e tarifanan social como cu e ta bisa cu segun ley Serlimar por cobra ni importe si ta recoge e sushi of no. E tin rason cu den ley ta para cu Serlimar berdad por cobra pa recoge y procesa. Y si ciudadanonan ta scoge pa un otro compania pa recoge, nan tin e libertad pa sigui haci. Sinembargo asina ta paga ‘dobel’ como cu den e tarifanan social parcialmente ta keda paga Serlimar pa e parti di recogemento tambe.

Esaki ta laga basta clientenan di otro companianan manera Ecotech awor cu disgusto. Y manera menciona hasta ta demanda Serlimar como cu nan tin contracto cu un otro compania cu no por a termina asina lihe. Como cu ta menos cu 2 dia adelanta y riba un diabierna laat cu gobierno a anuncia e cambio (29 juni atardi despues di 5 or a anuncia cu lo drenta na vigor riba diadomingo 1 di juli).

Clientenan di otro companianan tambe ta puntra con awor cu e container como cu nan no tin di Serlimar mas.

Bruhacion: cada vivienda = punto di recogemento di Serlimar
Segun minister di Medio Ambiente cada vivienda mester paga Serlimar obligatoriamente pa nan servicio. Pasobra esaki ta para den ley. Sinembargo analisando e ley concerni, articulo 8 ta papia di ‘ophaalpunt’ (punto di recogemento). 8.1 ta bisa cu Serlimar en berdad por cobra pa punto di recogemento. Y cu un punto di recogemento ta comprende un vivienda riba un parcela o cualkier unidad di vivienda separa riba un parcela.

Sinembargo den e ley aki no ta para cu tur vivienda automaticamente ta punto di recogemento di Serlimar. Den e caso cu bo ta cliente di un otro compania, e pregunta ta: bo ta considera un punto di recogemento di Serlimar ainda of no? Si nos ta sigui e pensamento di e minister, dicon na 2014 Serlimar a emiti e formulario manera por mira riba e pagina aki. Unda ciudadano por cancela e servicio di recogemento di Serlimar y e compania a abstene di cobra. E vivienda di e ciudadano cu a cancela Serlimar, asina a bira un punto di recogemento di sushi di un otro compania.

 

 

 

You May Also Like

5P3A9991.JPG

Desconocinan a los varios tiro riba Hulpbestuurskantoor na Santa Cruz

Diamars atardi na momento cu e oficina di Gobierno na Santa Cruz tabata cerando ...

Atracado di afo tin un record criminal pisa y ta bandona Aruba lihe

Durante e debate rond di e problemanan di criminalidad dialuna den parlamento, cuerpo di ...

Situacion financiero obligando hende pidi ayudo via Facebook

E situacion financiero na Aruba den e ultimo tempo aki no ta den su ...

5septNG SIMAR.jpg

SIMAR y Minister ta contradeci otro

Diabierna ultimo a yega na un acuerdo cual ta conduci na reanudacion di trabou ...

Campaña nobo pa protege nos beachnan y duinnan

Ayera  un aliansa nobo entre ATA, Ahata,  cuerpo policial (KPA) y Blue Blocks Aruba ...

Arubalening Portal ta digitalisa servicio di Arubalening

Den cuadro di mehoracion di servicio na studiante den e proceso di preparacion y ...