Home Editorial Sindicato a bira partner exclusivo? Den consulta di asuntonan social?

Sindicato a bira partner exclusivo? Den consulta di asuntonan social?

299

Den nos anterior Editorial nos a elabora riba e aspectonan legal di e cobranza di Serlimar via Servicio di Impuesto, y den e espacio disponibel nos no a logra trata tur tampoco. Manera e asunto di posibel violacion di regla encuanto datonan personal di e clientenan di Serlimar, cu ta bay haya un clasificacion segun nan entrada, manera nan a declara esaki na e instancia di Impuesto aki.

Esey ta si esaki lo bay sucede asina, pasobra nos tin nos duda grandi si esaki ta posibel asina. Servicio di Impuesto sin mas por duna informacion di tur ciudadano, den cual categoria di entrada nan ta cay, pa seguidamente pasa esaki pa Serlimar? Tin ciudadano a señala cu esaki ta un peligro grandi, pasobra Serlimar lo ta un organisacion yen di nombramento politico cu por bay haci mal uzo di e informacion aki. Nos no ta ni duna un opinion tocante e estado organisativo di e empresa publico aki, pero ta pensa cu di mes caba e intercambio di dato aki no por tuma luga.

Posiblemente e areglo vocifera pa e ministro concerni ta en pugna cu e Landsverordening Persoonsregistratie, cu no ta permiti sin mas e traslado di informacion di persona pa otro instancia,  aparte cu e leynan bao di cual Servicio di Impuesto ta opera ta restringi e traspaso di informacion severamente. Tambe mester tuma na cuenta cu den e caso di e servicio di Serlimar no ta trata di un impuesto, cu segun un ley adecuadamente formula por cobra un persona segun su entrada personal, pero di un servicio brinda na tur ciudadano por igual. For di e palabranan di e ministro expresa den prensa nos ta haya e impresion cu e ta kere cu e asunto aki ta regla caba cu Servicio di Impuesto, pero nos tin duda grandi cu por hinca e asunto aki den scochi di e Servicio aki, sin sikiera cambia ley.

Pero nos ta desea di atende un otro asunto cu a capta nos atencion den e polemica aki. E ministro concerni ta anuncia cu el a delibera cu sindicato(nan) cu a fungi aparentemente como ‘sparring partner’ den e consulta, supuestamente como representante, moral?, di e ‘homber chikito’… Really? Nos a kere cu ora gobierno, o un ministerio, ta atende den consulta un asunto di importancia nacional, e forma pa haci’e ta pa consulta cu e organisacionnan mas representativo di banda di empleado y di dunado di trabao.

Aunke nos tin duda cu e asunto riba su mes merece e trato como asunto pa un consulta tri partite, pero esey riba su mes no ta duna e sindicato e derecho di papia na nomber di e clientenan di Serlimar. E eror grandi cu ta comete aki ta cu ta crea e impresion, falso, cu ta trata di un asunto di e ‘homber chikito’ cu ta netamente un asunto pa e sindicato atende, exclusivamente.

Talvez lo tabata mas na su luga, si e ministro tabata desea di tin un huicio bon analisa y evalua, pa pone e asunto aki den man di Conseho Socio Economico (Sociaal Economische Raad; SER). Nos por imagina cu e no a desea di cana e caminda ey, pasobra por bien ta cu e lo no a haya e contesta cu e tin gana di haya?

Un di e contestanan cu e por haya, probablemente, ta cu mester studia un asunto asina di tur banda, y no manera a haci awor, practicamente decreta cu e ‘schoudernan mas hancho mester carga mas peso’. Esey ta regla en berdad asina, por ehemplo den nos leynan di impuesto, unda nos ta paga inkomstenbelasting segun e filosofia cu esunnan cu tin mas entrada, ta contribui relativamente mas na caha di gobierno. Pero esey no por significa cu automaticamente por declara esaki aplicabel den tur otro caso cu ta antoha un mandatario?

Loke ta molestia particularmente anto den e cuestion aki ta e populismo cu ta maneha aki, unda esun cu tin obhecion facilmente ta keda tilda di ‘no tin curason’. Ken por ta contra di algo asina noble manera cobra e ciudadano segun su cartera por afford? Ken por ta contra pa duna proteccion na e ciudadano di cartera smal contra e mundo mahos y enemistoso aki? Ken por ta contra? Aki e ministro concerni caba a hinca su coleganan di coalicion den un ‘camisa de once varas’ pasobra si nan no apoya su propuesta, nan no ta solamente torpedea su maneho, sino ta haya e sindicato tambe contra nan… Pa un partido di corte social democrata y cu ta bisa cu nan ta ‘pone e persona central’ esey ta un posicion frega pa ta aden.

Sin embargo, tin un otro manera pa contempla e asunto aki, y ta esey nos ta haci. Nos ta biba den un pais ordena, unda ta goberna, en todo caso mester ta asina, segun reglanan di ley. Nos ta spera di un prome minister cu tabata inspector di impuesto cu e lo sa di evalua e asunto aki corectamente. Y cu den esey e lo tuma na cuenta cu Servicio di Impuesto mester bay den direccion di simplifica e tarea cu nan tin. Anto mester bay haci e ‘karweitje’ extra contra ley aki?