E grupo extremista Islamico, esta ISIS a bira un preocupacion mundial y e preocupacion aki tambe ta existi cerca nos clero na Aruba. Den cuadro di e reunion anual di nos diocesis, Vicario Episcopal di Aruba, Reverendo Rey Nares a referi riba menasa di ISI cu den su afan pa propaganda Islam cantidad di Catolico y Cristian a bira victima di nan.
Aunke e reunion diocesano cu a tuma luga na La Cabana siman pasa a pone atencion specialmente na e plan pastoral, pader Rey Nares a expresa na Bon Dia Aruba cu henter iglesia Cristian Catolico, y tambe otro tipo di organisacion religioso of creyentenan cu no ta cristian manera Budistanan y Mormonnan y otro mas a expresa nan preocupacion cu e menasa di ISIS.
“Nos tur ta preocupa pasobra nos tur ta afecta pa e accion aki di e extremistanan di ISIS ta haciendo cu ta destruyendo hende, nan ta destruyendo naturalesa”, el a bisa.
Tambe pader Nares a referi na e exodo di hendenan cu mester bandona nan pais afecta pa e guera di ISIS. El a declara cu mester traha pa paz y reconciliacion.
E ta haya cu no solamente esunnan cu no ta kere den Cristo ta victima di e extremistanan di ISIS, sino tambe ta e caso di e Mormonnan y tur esunnan cu no ta di acuerdo cu nan pensamento, ta bira victima di nan.
“Nan ta extremistanan cu henter mundo mester condena”, el a declara.
Vicario Episcopal di Aruba a señala cu Iglesia Catolico ta preocupa pa e presencia di ISIS. El a agrega cu Santo Papa Francisco ta bisa cu mester resa hopi pa e menasa di ISI termina, sino nos ta bay den mas destruccion den mundo.
