Bon Dia Aruba a haya varios keho via nos pagina di Facebook, unda cu clientenan di Scarlet ta puntrando kico a pasa cu e compania di internet.
Clientenan a haya e-mail di e compania unda cu a pidi disculpa pa interupcion di servicio mei cual a dura 2 siman riba 25 di mei. E compania a ofrece internet gratis pa e periodo di 2 siman cu clientenan a paga pe, pero despues di e comunicado aki clientenan no a tende nada mas di e compania. Segun e clientenan ora ta purba di yama via telefon ta parce cu e telefon di Scarlet a wordo desconecta.
Bishita na Scarlet
Bon Dia a acerca oficina di Scarlet situa na Vondellaan y a nota inmediatamente cu e luga tabata cera. Despues di e ranca bel varios biaha un empleado cu kier pertenece anonimo a habri porta y a splica cu varios empleado a kita for di trabou y cu doñonan actualmente ta na Hulanda. Segun e empleado, e operacion di e compania ta basa riba Corsou, unda cu e compania a haya problema pa por sigui draai. Te hasta cu e compania na Aruba tabata cubri mas gasto pa por sigui draai. E empleado no kier a comenta mas cu esaki.
Clientenan preocupa
Varios cliente ta preocupa cu algo similar lo pasa cu e situacion na MIO, unda e compania no a cumpli cu debernan y a laga clientenan pa lidia cu e situacion riba nan mes. No por confirma ainda cual ta e situacion cu compania Scarlet y su clientela, pero redaccion di Bon Dia Aruba ta nota cu personanan cu a paga di adelanta lo mester por haya algun splicacion of rectificacion.
