ORANJESTAD, ARUBA: Segun nos colaborador na Noticia Cla, diabierna anochi ultimo Caribbean Mercantile Bank N.V. a lansa un producto unico: autonobo.com. E producto nobo aki a wordo desaroya specialmente pa CMB, y e tin algun caracteristica hopi exclusivo y inovativo cu lo sigur pone e banco den un posicion di liderazgo pa e añanan cu ta bin.
BALLROOM
Den e ballroom di Alhambra hunto cu representantenan di tur agencia di auto nobo aki na Aruba, ehecutivonan di CMB a haci e anucio special aki. Director di CMB Javier Wolter a habri e anochi anunciando cu e banco y su profesionalnan a dura casi un aña y mey pa desaroya e producto aki y asina pone traha teniendo na cuenta tur aspecto di nos cultura local, industria di auto na Aruba y tambe con nos hendenan ta shop y financia auto. Siguientemente, Armin Solognier di CMB a introduci e producto y splica su pakico y dicon, di biaha e la duna un demostracion live y completamente online.
CHARACTERISTICANAN
Un di e caracteristicanan di mas unico na autonobo.com ta cu e lo permiti tur agencia di auto local upload nan inventario completo for di nan propio oficina. For di e “back-end” di e software nan lo por pone potretnan di modelonan di auto of brommer cu nan tin den stock, pero tambe informacion specifico di cada auto manera color, VIN nummer, specificacionnan y otro informacion vital. Esaki lo duna e cliente e impresion cu e ta shop pa e auto mescos e ta den showroom y no un modelo di catalog.
APLICACION
E banco tambe di biaha a anuncia cu nan a logra integra aplicacion pa financiamento completamente online den e site aki di autonobo.com, dus e cliente por shop pa su auto y di biaha completa full e proceso di aplicacion incluyendo upload identificacion, pay slip, carta di doño di trabao y otro documento den un solo biaha usando nan propio smartphone of computer. Pa celebra e noticia aki, CMB di biaha anuncia cu nan lo duna un interes reduci di 7.5% p.a. ariba tur prestamo pa auto nobo te cu october 31, 2015. E interes special aki ta haci loke ya caba tabata e miho deal y e pago mensual di mas economico mas atractivo ainda.
INVENTARIONAN
Den e siguiente dianan y simannan clientenan lo ripara con e inventario online na autonobo.com lo crece y crece mientras tur e agencianan local ta upload nan inventario. Mas opcion, mas modelo, mas color y tambe mas libertad y trankilidad pa e cliente por shop y haci su escohencia. Por bisa cu den esencia CMB a crea y haci un realidad pa Aruba tin un awor un “Car Show” cu ta 24 ora pa dia y 7 dia pa siman.
