Crisis Management Office (CMO) a tene un conferencia di prensa e dia di ayera pa informa tocante e training Caribe Wave cu ta bay tuma luga dia 21 di maart proximo y ta nan invita comunidad pa participa den dje pa asina tin un bista di kico ta e preparacionnan den un caso real di tsunami.

Rino Hermans di CMO a informa cu dia 21 di maart 2024 pa entre 1.30 y 2or di merdia ta bay tin un training regional pa cu tsunami yama Caribe Wave, esaki ta trata di un training pa tsunami realisa pa Coordination Group for the Tsunami and Other Coastal Hazards Warning System for the Caribbean and adjacent Regions (ICG CARIBE-EWS) di Intergovernmental Oceanographic Commission (IOC) di Nacionnan Uni pa Educacion, Ciencia y Organisacion (UNESCO).

Recientemente e fenomeno natural historico aki a determina e nivelnan di vulnerabilidad y riesgo pa e bida y medionan di sobrevivencia a traves di e tsunaminan na lo largo di e costanan di Caribe y regionnan cercano. Ehercicionan of training aki ta proporciona un incentivo fuerte pa paisnan por prepara pa un tsunami y pa comunidad participa den ehercicio aki.

Lothar Irausquin di Meteo a informa cu durante e ehercicio ta pone na prueba e canalnan di comunicacion pa ricibi e tsunami boletin, centenares di persona a participa den dje den ultimo decada pa asina yuda fortalece e consciencia y preparacion pa e evento poco frecuente aki pero cu tin un impacto halto den Caribe.

Den ehercicio aki a pone dos escenario: un tsunami genera pa un teremoto di Mw 8,47 na trench di Panama y otro genera na trench di Puerto Rico di Mw 8,7.

Rino Hermans di CMO a sigura cu Aruba ta bay tin e ehercicio aki pa cu tsunami y pa CMO segun e scenario cu UNESCO a determina, esun di mas importante y esun di e riesgo di mas grandi pa Aruba ta Panama trench cu ta esun cu lo afecta cu olanan mas halto, den scenario si Aruba no haci nada cu esaki, esey ta nifica cu nan lo tin un perdida di bida di acerca 40.000 persona y nan ta predetermina cu 37% di economia di Aruba lo haya un impacto directo.

E olanan lo ta entre 1 y 3 meter di haltura y ora esey ta tuma luga asina, e criterio ta pa tur hende ta pa evacua e beachnan, e prome ola lo yega 1 ora y 43 minuut despues di e teremoto.

E boletinnan pa stakeholders manera brandweer, polis y tambe prensa ta bay ta den 4 idioma, Ingles, Hulandes, Spaño y Papiamento.

Esaki ta basa riba modelonan pero nan no a tuma den consideracion cu tsunami di Panama lo destrosa tur e area di hotelnan, hospital y tur deposito di cuminda na Aruba cu ta den e area cu lo por ta afecta cu ta 3 meter, suficiente pa drenta 1.5 kilometer di e costa.

“Nos ta bay training di manera real y si tin barco crucero den waf e dia ey nos ta bay wak kico e capitan ta bay tuma na su decision, pasobra e tin 90 minuut pa sali for di costa, si no ta sali for di costa nos ta keda cu e efecto y e barco crucero lo hala un tiki mas paden di Aruba y nos tin cu deal cune.” Hermans a sigura.

Segun por a compronde for di Hermans, esaki ta ultimo biaha cu Aruba ta bay train cu e sistema aki, otro aña lo tin training cu Early Warning cu na augustus di e aña aki ta bay keda inaugura y Aruba ta bay den direccion di alarma nacional cu ta bay tin ademas di e sirena, e bos, e cual ta duna indicacion di kico tin cu haci despues di esaki.

“Nos ta encurasha tur hende pa participa pasobra un famia tambe lo mag di bay riba www.tsunamizone.org y registra, mester indica cuanto di cuanto miembro e famia ta y na unda e ta biba pa nos por tin un bista di esaki,” el a sigura.

Despues di e ehercicio, nan tambe ta bay haci un encuesta pa haya sa si e ehercicio a bay bon, kico ta e puntonan pa mehora, pa e motibo ey nan tambe ta pidi pa yena e encuesta ey.

Nan ta bay monitoria cuanto hende a participa y cuanto hende lo a fayece door cu segun Hermans a señala, Aruba tin un tendencia cu no ta train of no ta participa pero ora cu algo ta sosode, ta cuestiona y critica.

Ademas, el a sigura cu tin hotelnan cu for di 2014 ta participa den full scala, ta evacua turistanan, pa nan tin tambe un concepto di kico nan plan ta y con e hendenan por actua.

En aña aki, SKOA cu su 48 scol tambe ta bay participa den e training aki y te cu ayera, segun informacion, nan a combina cu Setar pa traha un comando center pa nan por evacua tur mucha, scolnan y asina tin un idea cu den caso di ta un realidad, kico ta nan capacidad y kico ta e puntonan cu nan tin cu duna atencion den añanan cu ta bay bin pa Aruba bira e isla mas sigur den Caribe.

“Ta importante pa nos train, e training aki ta dura entre 1 ora pa 2 ora y ta bay haya un conocemento di e capacidad cu tin y kico ta stroba pa scapa bida di hende, nos principio na CMO ta pa scapa bida, infrastructura, medio ambiente, economia y restart lo mas lihe cu ta posibel,” Hermans a señala.

Pa haya sa mas informacion por bishita e website www.caribewave.org unda ta splica tur loke ta haci den e ehercicio aki Caribe Wave, tambe por haya ki ora un teremoto a sucede, travel time di e olanan y ki ora nan lo por yega Aruba.

CMO y Meteo tambe a pidi na comunidad pa no drenta den panico ora ta realisa e training aki pa motibo cu ta trata di un training y no un evento real.