E tension entre ATA y Ahata, despues cu e ley di all inclusive a keda aproba y e decision di e asociacion di e sector hotelero di retira nan miembronan for di hunta di supervision di ATA ta cuestion di pasado.

Diamars ultimo, despues di participa den un conferencia di prensa den  e sede di Ahata, directora di ATA, Ronella Tjin-Asjoe-Croes a declara na Bon Dia Aruba cu kisas e biaha aki prensa ta mira su persona den  oficina di Ahata, pero semper su relacion cu e asociacion aki a keda uno “hopi bon”.

Entre ATA y Ahata semper nan a keda traha, incluso aña pasa durante e discusion hopi pisa rond di e ley di All Inclusive,  e colaboracion a keda. “Mester kita e duda eynan. Nos por hacie di otro manera. Nos mester keda traha hunto”, el a bisa na e matutino aki.

Hunta supervision
A pesar cu durante varios luna e hunta di supervision no a conta cu e tres miembronan di Ahata, e echo aki no a afecta e maneho di ATA. Sra. Tjin-Asjoe-Croes a bisa cu e maneho no ta mara na e echo cu e hunta di supervision mester ta completo. Sinembargo como ATA nan ta prefera di traha cu un hunta di supervision cu ta completo.

El a laga sa cu e hunta di supervision a sigui  carga e tarea, conhuntamente cu ATA pa asina sigura cu e organo aki sigui move conforme legislacion.  Sinembargo directora di ATA a laga sa cu semper nan deseo, incluso di e hunta di supervision anterior, tabata pa nan por ta completo mas tanto cu ta posibel.

“Bo tin un hunta  di supervision di shete. Semper esey ta brinda un plataforma mas amplio kisas pa discuti diferente aspectonan. Con cu bay con cu bin no ta por nada e ley ta pidi Ahata pa nomina seis.”  Nan participacion tambe ta trece cierto experiencia na mesa, y esey e ta mir’e como e manera mas eficiente y “esey tabata e deseo di un y tur tambe. Aworaki nos tin un hunta di supervision completo atrobe”.

Finalmente e hunta di supervision di ATA ta conta cu presencia atrobe di Ahata, manera a keda informa recientemente. Sra. Tjin-Asjoe-Croes a bisa cu actualmente e hunta nobo ta den proceso di wordo formalisa, despues cu a bira conoci di parti di Ahata kende ta e miembronan cu lo forma parti di e hunta di supervision aki. E formalisacion aki ta pa medio di un Landsbesluit cu mester wordo canalisa.

Cuenta anual 2016
Mientras tanto ATA a cuminsa cu e transicion y tambe a finalisa e rapport anual y auditoria pa 2016. Directora di ATA ta considera e proceso aki sumamente importante di por finalisa e transicion aki cu e board anterior. Di e forma aki e hunta di supervision nobo por drenta cu mira pa dilanti, y no tin cu atende cu un aspecto cu ta asina crucial cu ta e cuenta anual di 2016.

Ya caba nan a tene diferente reunionnan  cu e hunta di supervision nobo cu ta consisti di miembronan nomina pa Ahata di cual minister di Turismo a punta diferente di nan.

E hunta di supervision di ATA ta conforma asina: Ahata tin tres asiento di cual nan ta nomina dos persona pa cada asiento. E nominacion aki a wordo manda pa minister di Turismo na inicio di e aña aki. Tambe di parti di e mandatario su banda e ta apunta  e tres miembronan for di e nominacion di seis.