RED – Un partido pa progreso

Nos a drenta aña electoral 2017 y ya caba por mira algun partido preparando pa subi caya y campaña. Varios partido ta cla y a cuminsa caba mientras cu otronan ta den nan ultimo fase di preparacion. Nos a acerca e diferente partidonan cu ta bayendo eleccion y lo ta siguiendo nan pasonan durante e proceso electoral compartiendo cada desaroyo cu presenta.  Segun e desaroyo di eleccion, nos lo bini cu entrevistanan bayendo mas profundo den e vision di cada partido. Den e manera aki abo como votador por keda informa y tin un bista mas amplio pa yuda bo cu bo decision di voto.  Awe nos ta continua cu Red Democratico Aruba (RED)


RED – Un partido pa progreso
Ricardo Croes, lider di partido Red ta bisa nos cu nan ta considera nan mes como un partido cu ta concentra riba progreso. Croes: “Cu esey nos kier bisa cu nos meta ta pa hiba Aruba pa dilanti, wak progreso mundial y wak kico nos por aplica ariba nos pais.” Locual ta diferencia partido red cu otro partido, segun sr. Croes, ta cu entre otro nan nunca tabata parti di ningun mal gobernacion. “Nos nunca a haya e oportunidad ni pa haci malo of pa haci fout ni pa ser tilda di ningun corupcion cu cosnan asina. E diferencia ta, cu partido Red Democratico, den nomber di profesor dr. Rudy Lampe,  como parlamentario a pasa entre otro cuarenta mocion den su periodo den parlamento di Aruba.” Ricardo ta sigui bisa cu tur hende por investiga pa nan mes y lo realisa cu gran parti di ehecucionnan di proyectonan ta a base di mocionnan di dr. Lampe. Sr. Croes ta menciona tambe como ehempel cu sr. Dangui Oduber di partido Mep a bin dilanti cu su cambio pa kiesverordening, y esaki ta algo cu Red a bin ta para pe desde principio caba. “Nos ta contento cu esey si, no compronde nos malo. Pa e motibo ey nos ta haci acuerdonan interno pa cu e cantidad di voto cual ta determina ken den Red Democratico ta bay parlamento.” Red Democratico ta desea pa pueblo di Aruba realisa cu nan ta consisti di hendenan serio y capacita cu tin Aruba na pecho anto segun sr. Croes, cu no tin materialismo of oportunismo na pecho. “Manera cu nos por mira otro partidonan cu ta uza oportunidad pa haci nan mes mas rico, esey no ta nos. Red Democratico ta un di e opcionnan corecto pa eleccion di 2017 y nos ta desea pa pueblo lanta y realisa cu nos no por sigui manera cu nos a bin ta sigui. Pa cual motibo awoki tin tur e diferente temanan aki riba caya.”

Preparacionnan
Otro candidato, drs. Nora Eleonora, tin un trayectoria largo cu partido Red for di un principio pasobra e ta bisa cu esaki ta un partido cu definitivamente ta para pa pueblo. “Nos a cuminsa na drecha nos cas cual tabata nos prome lema. Cu oreanan grandi nos a scucha pueblo, kico ta biba den pueblo y con nan kier nos representa nan. Esaki ta e diferencia mas grandi di tur otro partido cu nos kier trece e bos di pueblo den parlamento,” sra. Eleonora ta bisa. Na momentonan aki e partido ta reuniendo cu candidatonan tentativo pa trece candidatonan nobo. Ta uzando rednan social pa trece puntonan pa dilanti cu nan ta kere cu mester atencion. “Anto nan ta hopi, paso ta cua ministerio no tin problema?”, Ricardo ta remarca. Riba locual ta preparacionnan di campaña, e ta sigui bisa nos cu: “Ami ta kere cu campaña mester ta den un forma mas neutral caminda cu no necesariamente mester expone e persona pa cua partido e ta vota. Ami ta kere cu hendenan mester pone atencion na debatenan cu mester wordo organisa. Den un forma cu tur partido mester wordo invita y tur rekisito mester conta pa tur partido.”

Pueblo a cuminsa habri wowo
Ricardo ta bisa cu nan a cuminsa parti algun sticker tambe pasobra tin hende cu kier demostra cu cua partido nan ta afilia, cual nan ta respeta derecho di tur hende.  Ricardo: “Pero nos a realisa si cu e campaña aki ta hopi keto. Si bo wak rond bon, na momentonan aki den pasado tin hopi mas autonan y casnan cu banderanan. Pero pueblo a cuminsa habri wowo y realisa cu campaña politico por tin consecuencia financiero, social y laboral pa nan si nan demostra cu nan no ta pro e gobierno principalmente. Y despues tin ora hasta si nan demostra cu nan ta pro un di e partido grandinan, anto e partido ey en cuestion no haya un oportunidad den gobierno y tin  di persecucion.” Pues pa e motibo aki segun partido Red, nan ta haya cu al contrario enbes di e hende ser exponi, laga e politiconan y partidonan haya suficiente publicidad pa trece nan plan pa dilanti pa e siguiente gobernacion.” Tin hende cu ta invita e partido pa bay nan cas cual nan ta bisa cu ta bon bini pa cualkier cu ta interesa di sa mas di e partido.  Eleonora: “Yama bo famia pa tur hende bini hunto y scucha kico nos ta para pe anto kico nos por haci pa boso.  Segun Ricardo ta conclui, pa partido Red ta importante cu tur debate politico haya cobertura amplio di media pa asina tur hende por hay’e pa medio di noticia, online y den television na nan cas caminda nan no ta exponi pa bay un actividad si nan no kier pa ser tilda of persigui.
Video di entrevista cu Partido RED

RED – Un partido pa progreso

#ELECCION2017 Lo bini cu entrevistanan bayendo poco mas profundo den e vision di cada partido. Den e manera aki abo como votador por keda informa y tin un bista mas amplio pa yuda bo cu bo decision di voto.

Posted by Bon Dia 24 Aruba on 18 Aprilie 2017

 

 

You May Also Like

POR – Union grandi di miembronan y candidatonan

Nos a drenta aña electoral 2017 y ya caba por mira algun partido preparando ...

“Faya-bo-haya” alarga te 24 di september 2017

Ministerio Publico y Cuerpo Policial di Aruba ta informa cu e maneho di faya-bo-haya ...

ABO – Un partido di hende humilde

Nos a drenta aña electoral 2017 y ya caba por mira algun partido preparando ...

Movimiento Arubano Soberano(MAS)

Nos a drenta aña electoral 2017 y ya caba por mira algun partido preparando ...