(AP) – Hopi biaha artistanan ta bisa cu e fanaticonan na concierto ta duna nan un shock manera electricidad. Coldplay kier haci esaki algo literal.

E banda famoso a agrega pistanan di baile unda cu e movecion di e persona ta genera electricidad, ademas di baisnan staciona na nan tour mundial mas recien, motivando e fanaticonan yuda duna electricidad na e show mientras cu nan ta baila of core e baisnan.

Esaki ta parti di e meta di haci e tour aki miho pa e ambiente. E banda, kende su canticanan ta inclui e cantica titula apropiadamente “Higher Power” a compromete di ta lo mas sostenibel y baho den carbon posibel, sperando di corta nan emision di carbon cu 50 porciento.

“Bo no kier pa hendenan kere cu bo ta haciendo dimas. Esaki ta e nivel perfecto unda cu e ta bon pa e ambiente pero e ta divertido tambe,” miembro di e banda Guy Berryman a comenta. “Esaki ta e manera cu nos ta trece dilanti, y si nan mira esaki como un oportunidad di participa den algo bon y pasa pret, cu e beneficio pa e medio ambiente, e ta agrega algo completamente diferente na e concierto y ta haci e experiencia uno unico.”

Cada pista di baile por wanta decenas di persona, cu electricidad crea cada biaha cu un persona move riba dje. E banda tin competencia pre-concierto unda cu nan ta mira cua grupo di fanatico por genera e cantidad mas grandi di electricidad, cu “Jump Around” di House of Pain.

Cada un di e baisnan disponibel, un minimo di 15 cual ta keda aumenta segun e tamaño di e lugar, por genera un averahe di 300 watt di energia, cual ta keda captura den bateria cu ta duna electricidad na e concierto.

Coldplay ta un di e actonan musicla cu ta poniendo nan esfuerso den reduci e efectonan di clima den nan tour, un lista cu ta inclui Billie Eilish, Harry Styles, The Lumineers, Dave Matthews Band, Shawn Mendes, Maroon 5, John Mayer, Lorde, The Chicks, Jason Isbell y The 1975.

“E relacion cu e musiconan tin cu nan miyones di fanatico no ta compara na ningun otro di cualkier otro figura publico. E por ta un ehempel cu ta cana y papia,” Adam Gardner, fundador y director co-ehecutivo di Reverb, cual ta un organisacion cu ta yuda banda haci nan concierto mas berde.

E artistanan ta reflehando un intento general den e industria di entretenimento, for di ekiponan di deporte te na fabricantenan di coy hunga, pa reduci nan emision di carbon. E estudio haci pa Live Nation a haya cu 82% di personanan cu ta asisti conciertonan a bisa cu nan ta duna nan miho intento den mantene un estilo di bida cu ta sostenibel pa e medio ambiente.

“E hecho di ta mas berde no ta un acto di caridad ni tampoco un acto pa elogia nos mes y pretende di ta mas cu cualkier otro persona of banda. Simplemente e ta e modelo corecto pa negoshi, y esaki ta loke nos kier demostra,” miembro di Coldplay Chris Martin a expresa.

LEAVE A REPLY

Please enter your comment!
Please enter your name here