Fake news riba medionan social a percura pa awe dos scol a manece cu tur tipo di medida di seguridad. E noticia tabata bisa cu lo tabatin hende awe na scol cu arma den nan poder. Tabata avisa muchanan cu miho nan no bay scol ayera mainta. E mensahe aki a plama riba henter e isla den un tempo cortico. Tambe despues tabatin un rumor cu lo a haya dos alumno cu arma na Colegio Arubano. Esey a resulta di no ta berdad.

Tur cos a resulta nada mas cu e noticianan falso ey, pero a obliga dirigencia di tanto Colegio Arubano como Mon Plaisirschool pa comunica cu tur mayor, den un carta y un mensahe respectivamente den cual nan a splica e situacion.

Den e carta di Colegio Arubano a referi na e noticianan falso, cu a haci cu ayera mainta tabatin extra vigilancia y polis na y rond di henter e scol. E scol mes no a ricibi menasa nobo, segun e carta. Tambe a informa cu si e scol mester ricibi instruccion di Cuerpo Policial pa cera e instalacionnan, lo haci esaki inmediatamente.

Tambe a duna notificacion di e pasonan tuma relaciona cu seguridad. Dialuna dia 20 di januari tabatin un sesion di informacion na docente y personal no docente tocante ‘school-shooting’ haci pa seccion di prevencion di KPA. Desde november e scol ta dispone di un Plan di Seguridad cu lo ser mehora. E plan ta riba website di e scol: http://colegio.ca-ict.net/ (Over Ons). A tuma contacto cu ministro di Enseñansa y cu ministro di Husticia tocante paso pa tuma proximamente relaciona cu un scol sigur. E proximo paso lo ta pa duna informacion/training na alumno. Intencion ta pa yega na trata e peligronan cu por surgi den klas y discuti riba nan, segun rector van Loon di Colegio, cu a firma e carta.

Tambe ta avisa cu control lo continua na scol, dentro di e facultadnan cu e scol tin. P’esey ta importante cu tur alumno tin nan carchi di Colegio cu nan pa por identifica nan mes. Tambe nan mester ta bisti cu uniforma di Colegio y ta pidi tur mayor pa pone bon atencion riba esaki.

Mon Plaisirschool.
Na Mon Plaisirschool tambe a tuma medida pa garantisa trankilidad na scol, a base di e incidentenan cu fake news den medionan social. E area rond di e scol aki tambe a haya vigilancia particular y policial. Presidente Randall Croes di SPCOA a laga sa cu aki tambe a bay un mensahe pa e mayornan pa duna di conoce cu tabata trata di fake news, pero cu no ta intencion di baha vigilancia.

LEAVE A REPLY

Please enter your comment!
Please enter your name here