Aña a habri cu situacion di scolnan, por a mira casonan di candela of mensahenan cu tin posibel ‘shooting’. A puntra vocero di Cuerpo Policial kico ta nan yamada pa mayornan sa kico ta den tas di nan yiu of controla locual nan yiunan ta haci.

Lito Lacle a splica cu e simpel motibo di control ta pa evita un arma di candela of cualkier obheto cu por uza manera un arma no por drenta scol. E proceso pa un mucha of hoben cu drenta ta haya ‘jeugdstraf’ tambe ta depende di edad si ta bay cera si of no.

“Nos trabou ta pa haci e parti investigativo y parti penal ora yega na detencion”, e ta splica. Ministerio Publico ta defini kico lo pasa den dado caso cu e hoben. Sinembargo, Lacle ta bisa cu como mayor mester confia bo yiu , pero ‘confia ta un cos pero controla ta miho’. E ta bisa cu semper ta uza esey pa conscientisa mayornan.

Tambe otro cos cu nan ta siña e mentor of docente ta pa nan tin un bon relacion cu nan studiante. For di nan, nan por sa ki momento algo ta bayendo robes cu e mucha, pa asina por pone mas atencion riba e mucha y si ta posibel un investigacion penal.

Conseho pa controla e mucha ta pa nan yiu no haci cierto jokenan grave, tambe den caso cu si ta un arma di aire pa tampoco no haci’e. “Tur cos cu ta uza manera arma tin consecuencia penal pa bo yiu por wordo deteni.”

A puntra Lacle, si scol tin derecho pa check nan tas pa prevencion riba tereno priva. E ta bisa cu nan tin autoirdad, pero ta keda na scol pa tuma cierto medida pa evita cierto cosnan pasa. Un scol cu tin mas di 1.000 studiante mester tuma medida pa evita algo pio.

Nan ta conseha pa scolnan cuminsa traha riba nan siguridad di scol, pa motibo cu te ainda nunca nada malo a yega di pasa pero importante ta pa e oportunidad keda chikito. “Tin cu zorg pa siguridad na scol, zorg pa docente tin bon relacion cu e mucha. Abo como mayor tambe mester zorg cu tin comunicacion bon cu mucha pa asina si algo bay robes por bati alarma mesora.”

Lacle a bisa cu reciente ta e prome caso cu a yega asina leu pero no ta e prome caso cu a bin dilanti na Cuerpo Policial.

LEAVE A REPLY

Please enter your comment!
Please enter your name here