Mescos cu algo mas di un mitar aña pasa, Colegio San Nicolas ta den noticia negativo atrobe. Hunto cu Inspectie di Enseñanza lo a detecta iregularidad na e scol pa cual, segun e mandatario, tin varios docente responsable. Ora nos tende e tipo di noticia aki, ta importante mantene calma y analisa loke ta pasando, sin cuminza tuma parti den e asunto aki, sin un base pa esey. Haciendo esey anto, nos ta den e obligacion pa haci hopi mas pregunta pa yega na conclusion.

Manera por a destila di e informacion duna pa e mandatario den su rueda di prensa di dia 11 di januari, por conclui cu su denuncia ta cu tin iregularidad den ora asigna na varios docente, cu no ta cuadra cu nan oranan regular cu lo mester ta asigna. Si esey ta asina, e promer pregunta ta pakico a asigna e oranan na e personanan ey, y ken, ademas di e propio docentenan, tabata envolvi den establece rooster di e scol. Manera nos a haya splica di varios banda, e rooster no ta iniciativa ni responsabilidad di e docentenan, sino di management di e scol, cu mester percura tambe pa e rooster haya aprobacion di Inspeccion y di e departamento di Scol Publico, DPS.

Pues e pregunta mester ta kico a bay malo den aprobacion di e rooster, unda segun e mandatario lo a pone ora extra pa cierto docentenan, pasobra mientras tanto ta januari, y aña escolar a cuminza caba na september. Ademas, desde inicio di augustus, despues di e anterior periodo di pleito y debate na e scol, tin un management team nobo cu ta na encargo di e scol, cu lo mester a tramita e rooster y e asignacion di ora cu e instancianan cu mester aproba esakinan, cu ta Inspeccion y DPS. Sin e aprobacion ey lo no por tabatin pago di banda di Finanzas.

Awor, naturalmente por ta teoricamente asina cu e iregularidadnan a pasa sin cu a ripara nan, te awor. Esey ta haci necesario pa tuma sancion contra esnan responsable, independientemente ken nan ta. Esey ta tarea di e mandatario, sin duda algun. Pero e ora mester tuma sancion contra tur esnan envolvi den e asunto aki, tambe eventual mando, di e scol y otro entidad, cu no a detecta loke e ministro ta denuncia awor.

Mientras tanto, Bon Dia Aruba a logra papia cu varios persona involucra cu e scol, cu ta mustra entre otro riba e situacion na e scol, unda pa varios vak no tin suficiente docente disponible. Si ta mantene e regla cu mester tin un cierto maximo di ora pa docente, e unico manera pa cubri e oranan aki, ta trece otro docente aden, si mester di por ehemplo Hulanda. Esaki ta hopi mas caro cu paga cierto docente extra pa nan tuma e oranan aki na nan encargo. Si e ministro ta desea di mantene estrictamente e reglanan di ora maximo, e consecuencia por ta cu mas alumno ta keda sin haya les, segun e comentario aki. Mirando tur esaki, ta parce nos util pa duna un claridad, sea di e ministro o di e otro instancianan envolvi, si esaki ta e trasfondo di e asignacion di mas ora na cierto docente.

Tambe a hala nos atencion cu di parti di e ministro encarga cu Enseñanza, Bon Dia Aruba a ricibi un rapport traha pa Inspeccion di Enseñanza, unda ta aparece un lista di docente cu ta atrasa cu entrega cifra di prueba cu alumnonan a haci. E lista aki, cu pa discrecion nos no a publica, no ta mustra un relacion directo cu e oranan iregular cu ministro a denuncia den su rueda di prensa. E ta mas bien un relato di un cierto momento di esnan cu ta atrasa cu entrega di cifra. Si mester tuna sancion apropia pa coregi esaki, ta privilegio di e ministro pa actua den esaki. Sin embargo, nos no por mira esaki como prueba palpable di cosnan cu a bay robez cu e oranan confirma pa e autoridadnan apropia.

Un otro punto valido di comentario ta e asunto di alumnonan cu ta haya critica cu nan lo no ta haci suficiente esfuerzo di sigui les online. Ministro ta aludi na un caso unda un docente di fisica di Colegio Arubano a colabora pa prepara cierto alumnonan, pero cu nan no ta aparece ni en persona, ni online. Esaki no ta faborable pa avance di e scol y alumnonan, pero en todo caso merece un comentario pa e asunto di online. Nos sa cu e tema di online ta un asunto importante pa e ministro, pero ta importante tambe tuma na cuenta e situacion di accesibilidad di internet pa alumnonan na San Nicolas. Ni e scol mes no tin un situacion stabil di internet, mucho menos un gran parti di e alumnonan na cas. Mescos cu gran parti di Aruba, e scol aki tampoco ta prepara pa esey.

Por ultimo, si acaso tin motibo pa autoridad actua cu forza den cualkier situacion, nan mester cumpli cu nan trabao. Sin embargo, e asunto aki ta parce di tin hopi ‘loose ends’ ainda, entre otro kico exactamente ta bay haci. Di esey no a tende nada ainda pa logra e ‘reset’ cu e ministro kier logra.

LEAVE A REPLY

Please enter your comment!
Please enter your name here