E posicion di Minister di Enseñansa riba e situacion di docentenan na Colegio San Nicolas, CSN ta lanta hopi pregunta. Esey ta reaccion inicial di SIMAR. Presidente di e sindicato di maestro a bisa cu “nos tin hopi pregunta. Nos no ta compronde con un Minister di Enseñansa no ta compronde, cu un docente no tin nada di haber cu trahamento di rooster,” Josephine Albertus, Presidente di SIMAR a bisa.

“Un docente ta yega na comienso di aña escolar, e ta haya su rooster y a base di e rooster, e ta traha e planificacion di su materia. Y a base di e rooster e ta traha su lesnan y reparticion. Cu Minister ta bin bisa aki, cu docentenan ta ‘sjoemel’ cu nan ora, simplemente no por.”

Albertus a enfatisa cu ta e Management Team ta traha e rooster, docentenan ta ricibi esaki. Rooster mester bay directiva di scol, y ta DPS mester wak si nan ta de acuerdo cune. Inspeccion di Enseñansa tambe ta hay’e pa wak pa mira si nan ta de acuerdo cu e rooster. “Kiermen, cu locual Minister ta papia no ta cuadra cu berdad. Nos ta den comunicacion cu e docentenan di CSN pa saca nan puntonan di preocupacion afo. Nos kier sali afo cu base, cu argumento.”

Segun e Presidente di SIMAR ta e momento ey por duna un reaccion debido.

“Pa bisa berdad, mi a keda sin palabra. No tin palabra pa locual Minister a haci. El a dicidi pa tira tur docente bou e bus cu acusacion cu no ta realistico. Tur docente sa cu locual Minister a bisa no ta cuadra.”

Bon Dia Aruba a bisa e Presidente di SIMAR cu pa añanan CSN a laga un docente encarga cu e rooster y Josephine Albertus tabata cortico: “E por ta berdad cu un docente ta keda encarga pa traha e rooster. Pero di ken e docente ta haya e instruccion pa haci e trabou aki? No ta di e propio Team di Maneho? Y ora cu e Team di Maneho haya e rooster, no ta DPS mester aproba esaki? Un docente su so no por traha un rooster. Dus si e rooster no ta bon, e responsabel ta keda e team di maneho.”

No a acusa docente di a ‘sjoemel’

Minister di Enseñansa Armando ‘Rudy’ Lampe a reacciona riba e forma con su informacion durante e conferencia di prensa a keda cualifica. El a argumenta cu ningun momento el a yama e docentenan di CSN pa corupto.

Locual el a haci ta papia di un rapport di Inspeccion di Enseñansa en general, un rapport cu a keda trata cu tur seriedad. E ta un autoridad riba su mes. “Inspeccion ta e instancia di control riba calidad di educacion y si e entidadnan educativo ta cumpli cu ley (rechtmatigheid en doelmatigheid). E Wet Openbaarheid van Bestuur, esta e LOB, ta haci cu tur documento di gobierno por bira publico, cu excepcion di lo por ta cataloga como un menasa pa seguridad nacional.

“E tema di discusion cu tin aworaki tocante Colegio San Nicolas ta e rapport di Inspectie y no por keda sin cu ta sigui cu e informacion pa remedia loke mester ta coregi,” e Minister a bisa. “Inspeccion ta den dialogo cu e Team di Maneho pa yega na un plan di mehoracion. Ningun momento ami como Minister a yama e docentenan pa corupto manera algun medio a insinua.” Pero, locual e Minister a bisa Bon Dia Aruba si ta cu e trabou cu Inspeccion di Enseñansa a haci ta un ‘moment opname’. “E ta manera un controlado ta aparece na trabou sin anuncia pa wak kico ta pasando. Ta doño di curpa ta manda controla y ta haya cu asina hopi hende no t’ey. Cu practicamente 10 klas cu pa tempo largo no a haya nan cifranan. Esey ta un hecho.”

Kier traha riba un bon ambiente di siñamento pa tur

E Team di Maneho cu ta sr. Samuel Dumfries y sra Robin- Ann Didder BSc.tambe a reacciona y bisa cu nan ta distancia di e palabranan ‘criminal’ y ‘corupto’ cu algun media a usa, referiendo na articulonan den media. “Nos docentenan no ta ni corupto ni criminal y ta traha cu tur energia pa alumnonan di CSN.”

Pero locual e MT a topa, ora cu a keda apunta como maneho interno, lo por yuda trece un mehoracion structural na e scol. Esaki den luz di e desaroyonan y tambe e control di Inspeccion. “E proceso ta andando y e cuerpo di docente ta keda informa. A referi mesora na e clasificacion di formacion historico y con e posibilidad di desplega e trabou di docentenan mester ta segun exigencia legal y di cantidad di alumno. E rapport di Inspeccion di Enseñansa di November 2020, ta duna un analisis di e desaroyo aki. E ta contene recomendacion pa CSN. E implementacion cu coreccion a keda ehecuta pa e MT na December 2020.”

Segun Dumfries y Didder, CSN ta para pa retonan e aña aki. E scol kier ta un ambiente di siñamento/educacion completo pa alumno y docente. E docentenan di CSN ta specialistanan riba nan materia y hunto cu nan , e MT kier traha riba mas profesionalisacion di docente y mehoracion di prestacion di alumnonan.

Origen di malentendimento

Minister Lampe ta enfatisa si cu awor e ta compronde e problemanan cu tabatin pa yega na entendimento cu docentenan di CSN. Pa hopi tempo, no tabata cumpli cu e exigencianan legal y algun materia tabata haya mas ora cu otro. “Pa hopi aña tabatin un hiba trece riba e reparticion di oranan. Tin un maneho pa overtime, pero nos no por a logra yega na un acuerdo. Locual e analisis di Inspeccion di Enseñansa a haci ta describi e origen di e problema y awor mi ta compronde.”

Falta di docente

Mientrastanto Bon Dia Aruba a haya un texto di un docente kende manera a bisa caba, a trata di yuda yena e buraco pa falta di docente y toch percura pa alumnonan di CSN haya les. Problema ta sinembargo cu hopi alumno no a parce di a aprecia e oportunidad. E docente a expresa su frustracion prome cu e vakantie di Pasco, y a bisa cu di su banda e ta haci tur locual e por a yuda nan cu e materia specifico. Ta materia pa examen y como tal, e tabata kier a yuda e alumnonan prepara pa e SE y despues examen final. E tabata kier pa nan a participa, incluso den e practicanan pa asina nan por a prepara miho posibel. Sinembargo, e docente a informa e hobennan cu si e mira con poco ta participa na e practicanan, e ta wanta su man na curason. Pasobra si nan kier logra pasa nan SE, nan mester ta bon prepara. El a pidi e alumnonan pa participa na e practicanan y a laga material cla pa e periodo di vakantie. El a informa tambe con limita su tempo ta pa dedica na nan, pa motibo di otro responsabilidadnan. Pero asina mes el a haci su maximo pa yuda e alumnonan. “Mi ta supone cu boso a traha riba e preguntanan selecta. Mi a tuma un ora riba Diasabra pa pregunta y splicacion, pero mi a ripara cu e siguimento di e lesnan online ta laga hopi di desea. Hopi alumno no ta bishita e lesnan aki. Pues pa mi e no tin sentido pa laga e les adicional riba Diasabra continua.”

No tin internet

Problema segun un otro docente na Bon Dia Aruba ta cu hopi alumno na San Nicolas simplemente no tin internet. “Di baina tin internet na CSN. E internet ta cay afo cada rato. Ami tin un klas unda ningun di e alumnonan tin internet na cas.” Den otro palabra, no por spera cu alumnonan di CSN automaticamente ta sigui lesnan online pasobra no tin e facilidad pa esaki na cas.

Ademas, segun e docente, atrobe den calidad di anonimato, e docentenan di CSN a contribui pa yuda yena e falta di docentenan cu mester pa tur e diferente vaknan. No solamente cu no tin docente suficiente na Aruba, no por busca docente na Hulanda. Es mas, hasta si haya un docente Hulandes dispuesto pa bin Aruba, no tin placa pa pag’e. “E ta costa como 200 mil florin pa trece y paga un docente di Hulanda, pa un aña. Ta placa cu Aruba no tin.”

LEAVE A REPLY

Please enter your comment!
Please enter your name here