Colombia a bira mercado principal di Aruba su turismo na Latino America

Colombia a keda un mercado fiel pa nos industria turistico, principalmente awor cu e situacion interno di Venezuela a haci cu actualmente e ta un mercado cu a cay substancialmente. Na 2018, e crecemento di e mercado aki tabata 11.1% di Colombia pa Aruba, y e aña aki e ta mustra cu lo sigui crece positivamente.

Director di ATA pa Latino America, Miriam Dabian, kende a ricibi un homenahe den cuadro di e realisacion di e conferencia anual di turismo pa nos mercado Latino Americano, a declara na Bon Dia Aruba cu Colombia ta un pais hopi atractivo pa Aruba. Aunke aña pasa tabatin un par di luna dificil, pero na final e crecemento a duna. Aunke ATA su expectativa tabata un tiki mas halto, di casi 20%. Interpretando e cifra di 36 mil turista Colombiano, e ta un cifra record, segun Dabian. “Di eynan p’ariba!,” el a expresa.

El a señala cu nan ta turista cu ta gasta, y cu ta gusta keda ya sea den hotelnan, Airbnb of bishita di famia. E tipo di bishita na Airbnb of di famia tambe ta sirbi –segun Dabian- pasobra si nan no ta paga hotel, toch nan ta bin haci gasto na Aruba. Esaki ta un aspecto importante pa ATA. Pa e turistanan bin disfruta di Aruba, experiencia un bunita isla y asina comparti informacion y experiencia cu nan amigonan. “Cada turista ta un influyente!” el a bisa. Tambe ATA tin su agencianan di publicidad pa henter e region aki, caminda nan ta segmenta nan promocion danki na e facilidad y flexibilidad cu e plataforma digital ta brinda. Esaki ta haci cu nan promocion por bira mas efectivo y segmenta.

Operacion aereo
E operacion aereo ta uno dinamico, ya cu Avianca tin dos vuelo pa dia. Mientras e compania Copa tin un vuelo diario, y den cierto ocasion, e ta bira dos vuelo pa dia tambe. E operacion di e compania Copa ta yuda pa transporta bishitantenan cu ta biba den otro ciudadnan mas leu cu Bogota, manera e region di Caribe Colombiano. Igualmente, nan ta inclui den su itinerario pa Aruba e bishitantenan cu ta bin for di Bucaramanga y Medellin, kendenan ta prefera bin via Panama y evita e friu y haltura di Bogota. Segun Dabian, e ciudadnan aki ta un potencial grandi pa nos turismo, ya cu hopi empresa ta estableci den nan.

Otro factor cu ehecutivo di turismo cu hopi experiencia den ATA a yega di señala, ta cu Colombia a crece economicamente, tambe tin siguridad y relativamente paz. Esakinan ta wordo refleha den e cifranan di turista, cu e interes ta grandi, y e interes pa e turismo di grupo ta grandi, ya sea di convencion y incentivo. El a laga sa cu esaki ta haci cu Aruba toch ta keda cerca di Colombia, y Aruba ta keda un opcion atractivo pa companianan cu kier incentiva of premia nan trahadonan pa bay un pais pa pasa un par di dia di convencion.

 

 

You May Also Like

Cuater empresa local na Feria Agro Alimentario 2017

Mañan lo tuma luga e apertura oficial di e 7 edicion di e Feria ...

editorial

Green Aruba sin tanto logro pa mustra

Vocifera intencion ta algo otro cu mustra logro! E siman aki Aruba lo conoce ...

Freezone Aruba NV tambe afecta por medio di situacion na Venezuela

Freezone Aruba NV a pasa den algun momentonan turbulento ultimo tempo hunto cu otro ...

Caso di depresion post parto mester di atencion mas profesional na Aruba

Un embaraso ta exigi cierto preparacion cu e pareha mester tene cuenta cu nan. ...

todd dandare menasa papiamento.jpg

Papiamento mester bin na prome luga

E linguista di Papiamento Sr. Ramon Todd Dandaré a declara na Bon Dia Aruba ...

bon dia citgo A3.jpg

Citgo inaugura: ‘Prome paso pa un relacion mas estrecho Venezuela – Aruba’

SAN NICOLAS –  Ayera mainta un steel band a percura pa trece un ambiente ...