(EFE) – Un avion militar di Colombia a yega ayera diabierna na Bogota cu 110 Colombiano cu tabata na Israel y a solicita bay pa bolbe nan pais debi na e guera cu e grupo terorista Hamas a cuminsa.
“Ta un oportunidad di bin un biaha mas na nos pais,” Maria Aparicio, un di e personanan repatria a bisa ora el a yega na e capital Colombiano.
Varios decena di stranhero a ser asesina, a keda herido of tuma como rehen for di dia cu e grupo Islamita Palestino Hamas a lansa e atake mas mortal contra Israel desde su fundacion, 75 aña pasa.
E guera a laga por lo menos 1.300 morto na banda Israeli y 1.500 na Franja di Gaza, como resultado di e represalia di Israel segun autoridadnan a indica.
Prome cu nan a bay Colombia back, e Colombianonan a conta cu nan a biba momentonan di teror.
“Bibando e situacion na Israel nos tabata sinti temor di no wak nos famia back,” Luis Fajardo a sigura ora el a baha for di avion.
Canciyeria a informa diaranson ultimo cu Ivonne Rubio, un Colombiano di 26 aña, ta entre e victimanan mortal. Na momento cu e prome atake a sucede, e tabata participando den un festival musical hunto cu su pareha, cu ta desaparecido.
E diasabra ey, un dia di descanso pa e Hudiunan, miembronan di Hamas a crusa e frontera via lama, aire y tera y nan a mata mas di 1.200 civil y soldadnan di Israel.
Marcela Munar, ken tambe a yega Colombia, a participa den un oracion colectivo na momento di su yegada na e pais. El a bisa na medionan local cu durante e atakenan el a logra haya refugio den e bunker di un hotel.
Miles di stranhero ta pega na Israel y na teritorionan Palestino, algun di paisnan Latino Americano manera Argentina, Mexico, Brasil y Chile cu a cuminsa operacionnan di repatriacion, mientras otronan a anuncia plannan pa evacua nan ciudadano.
Pa awe tin planea un otro vuelo for di Israel segun Canciyeria a splica, pero no a duna detaye tocante cuanto hende lo mester yega.
