Fiscalia Colombiano a indica cu un hues a otorga orden di captura pa integrantenan di Comando Central di ELN, loke ta relaciona cu e atentado terorista contra e scol di polis dia 17 di januari pasa na Bogota. Fiscalia a indica cu e orden di captura ta pa cuatro miembro di e Comando General di ELN.
E medida a ser emiti contra Nicolas Rodriguez Bautista, alias ‘Gabino’, maximo hefe di e guerrilla; Eliecer Erlington Chamorro, alias ‘Antonio Garcia’; Gustavo Anibal Giraldo, alias ‘Pablito’; y Israel Ramirez Pineda, alias ‘Pablo Beltran’, ken tabata e hefe negociador di e grupo arma den e dialogo fracasa cu gobierno Colombiano na Habana, Cuba. E personanan ya tabata conta cu alerta cora di parti di Interpol.
E organo acusador a bisa cu e cuatro personanan aki lo mester responde pa e delitonan considera como infraccion di derecho internacional humanitario manera terorismo, homicidio, secuestro, entre otro.
Despues cu e noticia a bira conoci, presidente Ivan Duque, desde isla San Andres, a aplaudi e decision y a sigura cu lo garantisa cu e hefenan di ELN lo responde na husticia.
Gobierno Cubano a desmenti dia 25 di januari pasa e participacion di e negociadornan cu ta na e isla, den e atentado di Bogota, y a descarta cu teritorio Cubano “a ser usa pa organisacion di acto terorista contra ningun estado.”
