Venezuela den mira… Tambe encuanto refineria…

Nos bisiñanan na otro banda di lama ta centro di noticia internacional actualmente, sin duda algun. Lastima cu ta pa noticia menos positivo, sperando cu cos por cuminsa drecha pa nan. Desde e huramento di Nicolas Maduro dia 10 di januari, e acontecimentonan a cuminsa sigui otro cu e velocidad di un bon pelicula di suspenso. Asamblea Nacional, e unico organismo na nivel nacional cu por a conta cu reconocimento internacional, como organismo eligi den eleccion liber na december 2015, a uza su prestigio pa declara e huramento y asuncion na poder di Maduro pa su segundo periodo, como ilegitimo y acto seguido a pasa pa nombra segun constitucion, su presidente, como presidente interino di e pais, cu e obligacion pa yama eleccion general den 30 dia.

Loke probablemente ni e propio miembronan di oposicion cu ta domina cu amplio mayoria e Asamblea, ni e Chavistanan mes, por a kere, a sucede: un apoyo amplio di mayoria di e paisnan riba continente Americano, cu e aliadonan di semper pa e Chavistanan, Cuba, Nicaragua, y Bolivia na e otro extremo, acompaña pa gobierno di Mexico cu ta aludi na imparcialidad, pero mientras tanto ta den e campo di e ultra-izquierdistanan. Union Europeo no a yega na un consenso encuanto un declaracion di reconocimento, pero paisnan importante manera Alemania, Francia, Spaña y Hulanda a pone un ultimatum, cu si gobierno di Venezuela no ta yama eleccion den 8 dia, nan lo pasa pa reconoce Guaido como presidente encarga.

Tambe a tuma luga algun suceso clave na Venezuela mes, cu ta indica cu e espacio pa maniobra pa e regimen Chavista a bira hopi limita. Prome caso tabata e aresto di Juan Guaido diadomingo siman pasa, pa elementonan di e servicio di inteligencia, cu mester a laga Guaido den libertad dentro di un rato. Sigur cu presion internacional a hunga un papel den esaki, aunke e regimen lo no admiti esaki hamas. Despues di e reconocimento di Guaido pa gobierno Mericano, Maduro a kibra relacion diplomatico cu Merca y a ordena nan pa sali di e pais den 72 ora. E Mericanonan a saca personal consular pero a nenga di desocupa e embahada. A reina un rato asina e posibilidad di un guera, si Maduro lo a ataca e embahada ora e ultimatum a vence diasabra pasa. El a dicidi di hala atras, mirando cu e Mericanonan a laga sa cu no ta haci chansa.

Kico tur esaki ta significa? Cu e probabilidad di enscena un matanza di e lidernan opositor a bira chikito, pasobra e regimen di Maduro a comprende cu cualkier accion den e direccion ey lo ta comienso di e final pa nan. Y loke ta bay sucede desde e momento aki ta e strategia di laga e regimen sin recurso. Banco di Inglatera a nenga di pasa un suma di 1,2 biyon dollar na oro pa e regimen. Ta papia na Merca caba di pasa placa cu normalmente lo a bay pa e regimen como pago pa crudo entrega na Merca, pa otro cuenta na beneficio di e presidente nobo reconoci na Venezuela.

Y, interesante pa Aruba, ta papia di e reconocimento di e gobierno nobo como representante legitimo di e accionnan di e consorcio di Citgo na Merca, loke ta otro golpi fuerte pa e regimen di Maduro. E presidente actual di Citgo Petroleum Corporation, Asdrubal Chavez, tin prohibi pa drenta Merca, y proximamente lo keda sin trabao pasobra Guaido lo por pasa pa nombra un directiva nobo pa Citgo, y pa e holdingnan estableci na Merca tambe.

Un di e holdingnan ta esun crea na 2016 pa atende e proyecto na Aruba, esta Citgo Aruba Holding LLC, cu ta doño di Citgo Aruba Refining NV lanta na Aruba, pa ehecuta e proyecto di rehabilitacion. E holding aki tambe, ora e cambio di representacion di estado Venezolano tuma luga na Merca, ta sali for di man di e regimen di Maduro, creando asina un situacion completamente nobo, pa Aruba tambe. Kico esey por bay significa pa e maneho na Aruba? Den cuestion di inversion no tanto, pasobra e pais ta bancarota y lo tin otro asunto mas urgente pa atende. Loke si por imagina cu ta reemplasa e gerentenan di e companianan na Merca y na Aruba tambe. Despues probablemente lo mester warda pa mira con e asunto politico ta bay desenvolve na e pais bisiña mes. Esey na su turno lo depende di cuanto tempo e regimen actual ta logra keda na poder, awor cu mas presion riba nan.

Di su banda, gobierno di Trump ta hunga un papel primordial, tambe den sancion economico. Un medida por ta e prohibicion di importa crudo di Venezuela, loke ta afecta cierto refinerianan na Merca cu ainda ta opera parcialmente cu crudo Venezolano. Sin embargo, e caida di importacion den ultimo añanan, di como 800.000 bari pa dia te talbes mita, a haci cu e refinerianan ya caba tabata buscando alternativa pa e crudo pisa Venezolano. Loke ta e perspectiva pa Aruba ta cu lo mester warda te ora tin un gobierno nobo na Venezuela, pa delibera con ta sigui cu e proyecto. No mester carga tanto speransa si, pasobra e proyecto aki nunca a pasa e mesun Asamblea Nacional aki…

You May Also Like

Gobierno ta ‘gaña lubida’ ley di financiamento?

Falta apenas seis luna pa eleccion y nada ainda di presentacion di un ley ...

Parlamento cu publico civilisa

Parlamento a manece e siman aki cu un publico bastante civilisa riba tribuna, cu ...

Nicolas Maduro ta rabia atrobe… E biaha aki di berdad?

Ayera di tur manera tabata un dia di gloria pa Nicolas Maduro. Aunke henter ...

Reforma fiscal pa ken?

What’s in it pa sector priva? Den nos Editorial di ayera nos a trata ...

E dia ‘mas Hulandes’ di aña

Desde poco aña atras, celebracion di cumpleaños di e monarca Hulandes a cambia di ...

editorial.jpg

E sorpresanan di fin di aña Gobierno como Sinterklaas y Santa Claus pareu

Fin di aña semper ta bay acompaña pa e sorpresanan di bao kerstboom cu ...