Despues cu un hues a confirma cu lo lanta e aresto domiciliario pa Alvaro Uribe, e ex-presidente a skirbi riba Twitter “Danki Dios”.

E decision a keda conoci diasabra ultimo y cu esey a termina e breve periodo di detencion den cas cu a wordo impone pa Uribe dia 4 di augustus ultimo.

E ex-mandatario (2002-2010) y ex-senador a ricibi e medida cautela aki debi na un proceso pa presunto soborno di testigo.

E huicio contra e lider di e partido Centro Democratico ta sigui na pia, pero e siguidonan di Uribismo ta califica esey como un victoria.

Alvaro Uribe, den su largo carera politico, a ricibi un dozijn di denuncia den su contra y tin varios huicio na instancianan hudicial Colombiano.

Na mesun tempo, e ta sigui como un di e politico mas popular di e pais sur Americano.

Despues di presenta su argumentonan, e hues di Bogota Clara Ximena Salcedo Duarte a anuncia su decision di duna Uribe su libertad.

E proceso contra e ex-presidente a cuminsa na 2012, ora Uribe a demanda pa supuesto manipulacion di testigo e senador Ivan Cepeda, ken den tempo ey tabata preparando un denuncia den su contra na Congreso pa supuesto vinculo cu grupo paramilitar.

Desde e incidente hudicial aki a keda habri un investigacion pa e ex-mandatario pa presunto manipulacion di testigo.

Despues di e orden di prizon domiciliario den su contra di Corte Supremo di Husticia, Uribe a renuncia na su funcion di senador, na augustus cu e cual el a perde e fuero legislativo y na consecuencia e caso a pasa na un instancia ordinario di Fiscalia General.

Uribe, ken ta mentor politico di actual presidente Colombiano Ivan Duque, tabata permanece bou aresto na su finca cerca di Monteria, e capital di departamento di Cordoba.

LEAVE A REPLY

Please enter your comment!
Please enter your name here