(AP) – Tur a sucede den un instante: Leidy Cadena a haya un sensacion di calor den su cara, no por a wak y su wowo tabatin sanger. E hoben studiante tabata un di e prome manifestantenan cu a reporta un lesion den su wowo dia 28 di april ora a cuminsa e yamada “welga nacional” na Colombia durante cu miles di persona a manifesta pa un reforma fiscal.
Leidy ken a perde e vision di un wowo, ta forma parti di un grupo di 103 Colombiano cu a sufri trauma ocular pa e presunto uso desproporcional di forsa di parti di agentenan policial den e marco di protestanan di e aña aki, segun un rapport publica ayera diabierna pa Amnistia Internacional e organisacion no gubernamental Temblores y e Programa di Accion pa Igualdad y Inclusion Social di Universidad de los Andes.
Mas di 70% di e casonan documenta a registra na Bogota, Valle del Cauca y Cauca, epicentro di protestanan cu a ser prolonga pa mas di tres luna contra e reforma gubernamental, desigualdad cu a bira pio cu e pandemia y exceso di polis.
Procuraduria -encarga di sanciona disciplinariamente e funcionarionan publico- a habri mas di 200 investigacion disciplinario na miembronan di polis pa agresion fisico, abuso di autoridad, acoso sexual y homicidio.
E protestanan den su mayoria tabata pacifico, sinembargo, tabatin foco di violencia: 2.500 civil y polis a resulta herido y oficialmente a reporta e morto di mas di 50 persona, di e cual 28 tabatin relacion directo cu e protestanan, segun rapportnan publico di Fiscalia. Organisacionnan defensor di derechonan humano a sigura cu e number di victima tabata mas.
