Desde awe diamars, 2,5 miyon persona cu ta biba den tres zona na nort di e ciudad lo bay den aislamento pa motibo di aumento di contagio di coronavirus cu tin e cifranan mas halto y ademas e cifra di ocupacion di cama na unidad di cuido intensivo.

“Nos lo cuminsa diamars awor un ciclo di cuarentena estricto na e localidadnan di Suba, Engativa y Usaquen, cu ta esunnan cu tin e ritmo di contagio mas halto”, secretario di Gobierno di Bogota, Luis Ernesto Gomez a afirma y tambe a bisa cu esey lo termina e dia 18 di januari.

Igualmente a expresa cu den e tres zona aki ta biba e mayoria di persona cu a sali di vakantie pa e dianan di Pasco, Aña nobo y Dia di Reyes.

“Nos ta tumando e medidanan di un manera oportuno y trempan pa salba bida, pa garantisa na tur e bogotano acceso pa servicio hopitalario”, Gomez a expresa, ken ta fungi como alcalde encarga di e capital Colombiano.

Na capital Colombiano, 480.219 persona a wordo contagia di Covid-19 y pa via di aumento di casonan den ultimo dianan ocupacion di ICU pa coronavirus ta na 77.6% kiermen cu tin 1.359 pashentnan den e 1.752 cama habilita.

E secretario di gobierno a detaya cu di e nobo aislamento aki lo tin restriccion di mobilidad y prohibicion total di actividadnan entre 8or di anochi y 5or di mainta, y cu lo cera tur e comercio no esencial.

Na Colombia tin 1.675.820 caso di covid-19, di e cual 85.039 ta sigui activo y 1.542.353 a recupera, mientras cu 43.965 a fayece.

 

LEAVE A REPLY

Please enter your comment!
Please enter your name here