Aunke autoridadnan no a oficialisa e informacion, e entidad Medicina Legal lo a haya cianuro den curpa di Rafael Merchan, ex- secretario di Transparencia di ex-presidente Juan Manuel Santos, haya morto 11 dia pasa den su apartamento na Bogota. E ex- funcionario a bira e segundo testigo den e caso Odebrecht cu a fayece bao di circunstancia sospechoso.

Un primo di Merchan a sigura e hecho na Noticias Uno a traves di un mensahe di WhatsApp. “Si berdad e informe final no a sali ainda , ya nan a confirma nos cu e causa tabata intoxicacion cu cianuro,” el a skirbi tocante e dictamen entrega pa Medicina Legal na december 2018. Y no tabatin un pronunciamento oficial riba peticion di e familiarnan di e fayecido.

Merchan tabata e principal defensa di Luis Fernando Andrade, ex-presidente di ANI (Agencia Nacional di Infrastructura), implica den e scandal di corupcion pa e sobornonan di Odebrecht na e consorcio Ruta del Sol II, y tabata suheto na aresto domiciliario.

Un luna pasa Andrade a denuncia intimidacion y miedo pa su siguridad. Despues di morto di Jorge Pizano, ex-controller di Ruta del Sol II y principal testigo di e caso, y di yiu di Pizano, Alejandro, venena cu cianuro, Andrade a pidi asilo na Merca.

Fiscal general Nestor Humberto Martinez tabata asesor huridico di e grupo Aval tempo cu a realisa e sobornonan di Odebrecht.

Pizano a denuncia e personanan cu tabata tras di e sobornonan. El a señala e fiscal general, como persona na altura di e corupcion, pasobra e tempo ey Martinez tabata fungi como abogado di e Grupo Aval.