Autoridadnan federal a captura na sur di Florida tres homber cu nan ta acusa di pertenece na un red cu tabata cumpra arma di candela semi-automatico y otro tipo di arma na distribuidornan autorisa, pa manda pa organisacionnan criminal na Colombia.
E envio a ser realisa den ultimo 12 luna, pa cual autoridadnan Colombiano ta investiga si e armamento a termina den man di Ehercito di Liberacion Nacional (ELN), cu a ser cataloga pa Merca como un grupo terorista.
E operativo a tuma lugar den e dianan despues di e atento terorista cometi pa Eln cu un autobom cu a explota na Scol di Cadete di Polis General Santander na Bogota, y a laga 21 morto, entre nan e chauffeur di e auto, y 68 persona herida.
Aunke e investigacion di autoridadnan no a duna indicio cu e armanan cu a bin for di Florida a ser utilisa den atentado, na e momento akinan sa cu e material di guera aki a ser manda pa Colombia scondi den compresor di aire di marca Husky.
E captura a tuma lugar danki na informacion suministra pa un di e cumpradornan fantasma,ken a graba un conversacion entre e delincuentenan ora nan tabata papia di e compra di arma y e envio pa Colombia.
E tres detenido a ser identifica como Francisco Joseph Arcila Ramirez, Gregory Fernando Ortega y James Smith. Na Colombia tambe a ser captura dos persona cu tabata encarga cu ricibi e envio: Alvaro Jay Arcila, ruman di Arcila, y su casa Ingrid Maldonado Perez.
