(BBC News) – Presidente di Colombia, Ivan Duque diasabra ultimo a anuncia cu lo mantene e militarnan na e ciudadnan na unda a reporta disturbio y “acto di vandalismo” asocia cu e protestanan cu ta sacudi e pais pa cuatro dia caba, y cu a laga por lo menos seis morto.

“E figura di asistencia militar lo sigui vigente den e centronan urbano na unda ta existi un riesgo halto pa ciudadanonan y na unda ta rekeri emplea tur e capacidad di Estado pa protege e poblacion” Duque a bisa na TV.

Ademas, el a indica cu su gobierno “no lo tolera mas actonan di violencia ni di vandalismo” durante e manifestacionnan.

E polemico despliegue di militarnan lo continua, segun e mandatario a bisa, “tanten e hechonan di grave alteracion di orden publico lo stop”.

E pais sur Americano, cu a haya un golpi duro di e pandemia di coronavirus, a drenta for di diaranson di siman pasa den jornada di protestanan intenso contra un proposicion di reforma tributario.

Sindicatonan di Colombia a convoca manifestacionnan na e principal ciudadnan dia 18 di april ultimo pa protesta contra e reforma tributario, cu lo a inclui un aumento di impuesto di renta y di productonan basico.

Gobierno Colombiano ta sostene e necesidad di e reforma tributario a causa di un gasto grandi cu e pais a enfrenta pa sostene e programanan social cu a introduci durante e pandemia di Covid-19.

Loke a cuminsa como protestanan pacifico a bira violento na algun ciudadnan, na unda a registra atakenan contra edificionan di gobierno y sistema di transporte.

E protestanan tambe tabata violento na Cali, e di tres ciudad mas grandi di e pais, na unda a registra kimamento di busnan y sakeo, asina como destruccion di banconan, oficinanan y negoshinan comercial.

Como resultado, varios gobierno local a declara toque de queda y a manda Polis y Ehercito.

Organismonan di derechonan humano ta sigura cu e protestanan a hiba na por lo menos na 14 morto, aunke e cifra no a wordo confirma.

 

LEAVE A REPLY

Please enter your comment!
Please enter your name here