Despues cu e siman aki e halto comisionado pa Paz, Miguel Ceballos, pa via di e atentado contra e scol di Cadete di Polis General di Santander a solicita pa Fiscalia General di Nacion pa adelanta e tramite di extradicion di e cuater negociado di ELN ( cu ta na Cuba), Pablo Beltran a contesta riba e peticion aki.
E solicitud realisa pa Ceballos ta pidi pa adelanta e extradicion di Nicolás Rodríguez, alias Gabino; Israel Ramírez, alias Pablo Beltrán; Luz Amanda Pallares, alias Silvana; y Juan de Dios Lizarazo, alias David Piñata, entre investigacion cu e Fiscalia ta adelanta pa e atentado cu a laga 22 cadete morto, dia 17 di januari pasa, y pa cual ya nan tin orden di captura.
Beltran, den un entrevista radial, a sigura cu desde cu e ta na Cuba ‘nan a honra e palabracion’ y cu e tipo di accion aki di Gobierno ‘no ta yuda pa kita e obstaculo riba e mesa di negociacion’, lanta pa presidente Ivan Duque despues di e atentado contra e Scol General di Santander.
Di otro banda, e halto comisionado, Miguel Ceballos a indica: “Esaki no ta un decision politico, ni un persecucion como Pablo Beltran kier manifesta”, sino un decision di un autoridad hudicial autonomo, pa motibo cu e ELN a reconoce e atentado, a traves di su direccion general, di cual e cuater persona aki a forma parti, y p’esey nan ta pidi pa su extradicion”, el a detaya.
Na mes momento, Ceballos a indica cu desde 1930 Colombia tin cu Cuba un tratado di extradicion, y ta espera cu e gobierno di e isla lo cumpli cu su palabracion.
