Veterano Politico Paul Rosenmöller, kende ta conoci den Caribe Hulandes, a keda selecta como presidente nobo di e Comite Permanente di Relacion di Reino di Eerste Kamer di Parlamento Hulandes.
Nombramento di Rosenmöller a keda anuncia durante e debate plenario den Eerste Kamer, na momento cu tambe a duna di conoce e otro miembronan di e comite permanente. Rosenmöller, kende ta un miembro di Eerste Kamer representando GroenLinks, lo releva Ruard Ganzevoort.
Rosenmöller ta hopi familiar cu e parti Caribense di Reino. Pa varios aña e tabata miembro di e Comite Permanente pa Asuntonan Antiano y Arubiano di Tweede Kamer. Na 2011 a pidi e pa presidi riba un comite investigando e screening di Conseho di Minister di Corsou, lidera pa e tempo ey, prome minister Gerrit Schotte. E comite di Rosenmöller a conclui cu e screening no a tuma luga di acuerdo cu reglanan.
Un miembro di Eerste Kamer pa ocho aña, Ganzenvoort a presidi e comite di cuater. “Tabata un honor y mi a haci esey cu placer”, el a bisa The Daily Herald diaranson. El a bisa cu awo e ta lagando e presidencia den man di un homber cu hopi conocemento y amplio experiencia trahando cu e islanan. “E ta perfecto pa presidente.”
Ganzenvoort a sigura cu e lo keda involucra den relacion di Reino, mientras e ta keda un miembro di e comite representando GroenLinks. Di e forma aki, e lo ta presente den e Consulta Interparlamentario di Reino IPKO otro siman.
Dos otro den e Comite di Relacion di Reino di Eerste Kamer cu tin afinidad cu e islanan ta ex- lider di D66, Boris Dittritch, y ex- miembro di Tweede Kamer, Jeroen Recourt di PvdA. Miembro di Eerste Kamer, Jeroen de Vries di FvD a wordo nombra vice- presidente di e comite.
