(Infobae) – Minister di Defensa di Colombia, Diego Molano, diabierna ultimo a sigura cu danki na operacion di Inteligencia Colombiano, nan sa cu “for di varios lunanan caba” Rusia ta coopera cu forsanan di Venezuela, despues cu Moscu a afirma cu “no ta descarta” un desliegue militar na e pais Caribeño y Cuba.

Molano a recorda cu tur e limite fronteriso di Colombia cu Venezuela ta “militarisa” como parti di un plan cu ta busca combati narcotrafico, loke na su huicio ta proporciona “siguridad” na Colombianonan pa un yegada eventual di forsanan militar Rusiano.

Gobierno di Rusia a sigura “cu no ta descarta” un despliegue militar na Cuba y Venezuela pa via di e tension cu Occidente pa e mobilisacion ultimo den relacion cu Ucrania y despues di manda varios tropa na Kazajistan, debi na protestanan ultimo contra autoridadnan.

Gobierno Rusiano a reitera den varios ocasion su compromiso cu Cuba, Venezuela y Nicaragua, paisnan cu ta yud’e tanto den terminonan politico como economico den ultimo añanan aki.

Moscu a bisa cu ta sinti su mes menasa pa e presencia creciente di OTAN na e parti west di Europa y ta mira cu preocupacion special e acercamento di Ucrania na Aliansa Atlantico. Diaranson di siman pasa, paisnan di OTAN y Rusia a celebra e prome conseho den dos aña y mey.

Di su parti, Merca a priminti un contesta “decisivo” si Rusia ta manda tropa na Venezuela y Cuba. Asina a señala diahuebs di siman pasa e asesor di siguridad nacional di Cas Blanco, Jake Sullivan. “Si Rusia lo cuminsa move realmente den e direccion ey, nos lo aborda di manera decisivo”, Sullivan a bisa.

Asina mes, el a señala cu Merca no ta kere cu Rusia a dicidi invadi Ucrania, pero nan ta prepara pa continua cu dialogo of pa “contesta di manera firme” den caso di un atake.

LEAVE A REPLY

Please enter your comment!
Please enter your name here