E vice-presidente di Colombia, Marta Lucia Ramirez, a sigura cu e gobierno di Juan Manuel Santos a gasta mas placa den relacionnan publico pa promove e acuerdo di paz cu a firma na 2016 cu e guerrilla di FARC en bes di e implementacion di e pacto.
Den un entrevista, Ramirez a afirma cu gobierno di presidente Ivan Duque no ta obstaculisa e acuerdo di paz y cu su antecesor ‘a baha e warda cu e lucha contra narcotrafico’.
Pa loke ta trata e acuerdo di paz, funcionarionan di gobierno anterior ta critica presidente Ivan Duque pasobra nan ta considera cu no ta haci e trabou suficiente pa su implementacion. Ramirez a contesta bisando cu ‘lo mas importante ta pa bisa cu esaki ta un gobierno responsabel absolutamente cu e pais, esaki ta un cu gobierno hamas lo comete e iresponsabilidad di dedica pa pone palonan den e rueda di e acuerdo’.
‘Loke ta pasa ta cu e gobierno a gasta hopi mas den relacionnan publico pa promove e acuerdo en bes di inverti recursonan efectivo pa e implementacion di e acuerdo’, Ramirez a bisa.
‘E gobierno anterior no a laga e presupuesto necesario pa implementacion, ni tabatin avance y suficiente logro na materia di implementacion. Nos, al contrario, ta implementando e; cual ta algo distinto na e observacion cu nos tin riba temanan importante manera e caso aki, por ehempel, di participacion cu e narcotrafico despues di e acuerdo’, el a sigura.
Tambe a destaca cu e paz berdadero di Colombia cu lo tin mester y loke lo sigui exigi ta un decision politico serio pa caba cu e narcotrafico, esey no lo tabatin den gobierno anterior, ‘cu e pretexto di ta negociando e paz, a baha e warda den e lucha contra e narcotrafico aunke nan lo por a sa cu no lo tin paz mientras narcotrafico ta existi’.
