Perseverance ta marca historia di NASA den varios aspecto. E yegada di e rover na planeta Mars no ta solamente innovativo pa e prome potretnan na color cu a saca, of pa motibo cu lo investiga si algun bes tabatin bida eynan.
Ademas di tur esey, e mision ta particular pa via cu pa prome biaha, e agencia a retransmiti un aterisahe planetario na Spaño.
Diahuebs 18 di februari, NASA a emiti e programa ‘Juntos Perseveramos’, na unda ademas di duna un bista detaya di e mision pa Mars, nan a destaca e papel di personanan Latino Americano cu ta traha den e mision.
Ken a presenta e transmision tabata Diana Trujillo, un ingeniero Aero espacial cu ta traha cu brasanan di robot di Perseverance, a traves di e cual nan lo recoge e muestranan di e planeta cora.
El a haci’e e traduccion den bibo for di Ingles pa Spaño, su lenga materno. Esaki ta un hazaña cu tabata parce imposibel den su adolescencia. Diana, un Colombiano naci na ciudad di Cali, a yega na Merca ora e tabatin 17 aña y sin sa nada di Ingles. El a paga su estudionan universitario cu loke e tabata gana trahando na casnan di famia.
“Nunca den mi bida mi a pensa cu mi por bay for di haci cas limpi y yega na e situacion aki trahando cu Mars 2020” Trujillo a bisa na e website cu NASA a dedica pa e mision di Mars.
Su pasion pa astronomia a cuminsa ora e tabata mucha. “Ora mi tabata na Colombia desafortunadamente tabatin hopi violencia y wak e streanan tabata algo cu tabata yuda mi pa mi calma”, el a agrega.
E soño aki a cuminsa bira realidad na Florida. Diana a studia Ingles na Miami Dade College y tambe tabata haci casnan limpi. Despues, a cuminsa studia ingenieria na Universidad di Florida y finalmente, el a gradua di ingeniero Aero espacial di Universidad di Maryland.
