E maneho economico di restriccion cu e gobierno nobo di presidente , Donald Trump, a priminti na Merca ta algo cu nos tambe ta sinti na Aruba. E promenan afecta ta e comunidad grandi di inmigrantenan Colombiano cu  ta manda nan ayudo pa nan famia den forma di divisa pa nan pais natal. Tambe e studiantenan Arubiano cu a bay Colombia pa sigui nan estudio universitario.

Ta asina cu 1 di januari ultimo e balor di e dollar compara cu nan moneda nacional tabata 1 dollar pa 3.002 peso Colombia. Apenas a  transcuri 20 dia so cu e mandatario Mericano a tuma posesion di su funcion; y e balor di dollar a devalua, kiermen e balor di e peso Colombiano a haya mas balor.

Awendia 1 dollar tin e balor di 2867 peso Colombiano, kiermen 135 menos cu un luna pasa. E tendencia aki ta afecta no soloe exportadonan Colombiano; sino e Colombianonan cu ta biba afo di nan pais y cu ta manda nan ayudo na ekivalente di dollar pa peso. Ya cu actualmente nan famia na Colombia ta hayando menos pa cada dollar cu nan ta manda; y e tendencia di e aña aki ta cu e lo sigui baha keto bay.

Situacion di dollar y peso Colombiano
Juan Carlos ta un Colombiano cu tin 18 aña residencia na Aruba. E ta traha den mundo di construccion; y aunke e tin su famia na Aruba, cada luna e ta manda un ayudo di 200 dollar pa nan mayornan na Colombia. Nan ta hendenan grandi, pero nan no ta gosa di un pensioen, manera nos grandinan cu ta haya un pensioen for di SVb. Antes nan mayornan tabata haya 600 mil peso Colombiano pa luna; pero awor nan ta hayando 560 mil peso, kiermen mas cu 40 mil peso menos cu antes. Pero e preocupacion mas grandi ta cu e tendencia ta cu e dollar lo sigui baha durante 2017 na Colombia.

E caso di Juan Carlos su mayornan ta un ehempel tipico di hopi famianan Colombiano cu nan nivel y calidad di bida ta depende di e ayudonan cu nan ta ricibi di nan sernan keri trahando den exterior.  Expertonan riba e materia aki ta indica cu durante e ultimo añanan  e personanan cu ta depende di e sorto di ayudo aki a gosa di e devaluacion di e peso Colombiano dilanti dollar. Tambe e studiantenan cu ta bin di exterior entre nan for di Aruba, ya cu nan placa ta rindi mas.

Efecto Trump
Analistanan economico ta indica cu e caida di e balor di dollar ta debi cu e henter mundo a cuminsa reacciona riba e maneho cu Trump kier hiba na Merca riba un economia proteccionista y independiente di  henter mundo. Esaki  ta trece un ambiente di preocupacion locual tin su impacto ya cu e dollar a cuminsa perde su forsa cu a gana durante e ultimo añanan, a lo menos  na Colombia. Pues e ‘efecto Trump’ ta e causa principal riba efecto di e balor monetario di dollar  na  Colombia. Pero manera a wordo bisa ariba, tur cos ta mustra cu e tasa di cambio entre dollar y peso Colombiano, si e  lo sigui baha mas abou cu e dos ultimo añanan. Tur cos ta indica cu durante e prome seis luna e balor di e dollar lo ta alrededor 2800 pa 2900 peso Colombiano  pa dollar.

E topico rond di e balor di e dollar no solamente ta afecta e importadonan y exportadonan cu tin actividad comercial cu Colombia, sino cu ta afecta e economia di divisa di e Colombianonan cu ta biba afo. Specialmente e comunidad Colombiano na Aruba cu ta esun mas grandi den Caribe di mas cu 15 mil Colombiano riba nos isla.

Segun economistanan Colombiano e posibilidad cu e balor di e dollar lo sigui cay t’ey keto bay.  Pero esaki ta depende di e medidanan cu gobierno di Merca lo sigui introduci riba su maneho economico di  presidente Trump.  E ambiente di duda cu ta existi mundialmente ta esun cu a crea instabilidad riba e balor di e dollar na Colombia. Tres aña pasa e dollar tabatin un balor mas abou cu 2 mil peso, pero durante e ultimo dos aña su balor casi a dobel debi na e efecto di e balor di e petroleo.