likmento y stimaruba.jpg

Sra. Olinda Rasmijn di fundacion ambientalista StimAruba a haya straño cu ni autoridadnan concerni ni trahadonan di Valero, no ta na haltura di e likmento cu ta tumando luga den refineria y cu ta causando daño na nos medio ambiente.

Sra. Rasmijn tabata hopi decepciona cu e tipo di denuncia serio cu nan a yega di haci como organisacion no gubernamental cu ta luchando pa proteccion y conscientisacion di nos medio ambiente, no ta hayando su debido atencion. No solamente nan no ta hayando debido atencion di nos autoridadnan competente encarga cu medio ambiente y naturalesa,  sino tambe for di prensa.

Ya e tin alrededor di 7 biaha papiando riba e likmento aki, pero aparentemente no tin niun hende interesa. E no kier gasta mas tempo riba e asunto aki, ya cu pa varios biaha e ta  denunciando e likmento aki. “E cos a caba pa mi. Ningun hende a bay wak. Ami no ta manda nada mas. Asina leu mi a keda…”, asina e ambientalista di StimAruba a bisa.

E echo cu e mesun lider di sindicato IOWUA di e trahadonan di Valero a yega di manifesta cu nan no sa di niun likmento den instalacion di e refineria ta straño pa StimAruba loke ta refleha cu  nan “no ta cana rond”. 

Denuncia

Bon Dia Aruba a puntra Sra. Rasmijn cu ora e fundacion aki ta haci e tipo di denuncia aki, si  nan ta documenta nan y entrega formalmente na Inspeccion di Medio Ambiente . Masha decepciona el a bisa cu nan a yega di manda cartanan sin cu nan por haya niun reaccion. P’esey despues di un aña e fundacion aki a bin cu e iniciativa aki di reacciona cu ainda niun cos ta wordo haci pa atende cu e likmento aki cu ta tumando luga na Rogers Beach  y pabou di lago.

El a recorda cu esaki ta un di e punto di trabou di StimAruba, pero nan no ta wordo informa tampoco. Pero a pesar di esey, e fundacion aki ta sigui traha cu e departamento concerni. Te hasta nan a bay wak caba tambe, pero nan no a wak e likmento tampoco. “E t’ey si, e ta bashando stret y no t’ey so, tambe ta na Rogers Beach”, el a bisa. El a agrega cu ora bo ta bishita e area ey, bo ta wal cu e ta lik ainda for di e barancanan.  

Falta di interes

E ta desapunta ya cu di otro banda bo no ta tende nada di e hendenan di medio ambiente riba e asunto aki. P’esey nan di fundacion StimAruba pa trece dilanti e asunto di likmento aki cu ta tumando luga den refineria na San Nicolas. “Mi ta trece pa dilanti pa kico? Pasobra e ta varios tempo caba cu nos ta manda carta anto niun hende ta contesta”, el a bisa categoricamente. 

Tambe Sra. Rasmijn a bisa cu tres siman pasa nan tabatin un reunion cu nos autoridadnan competente y den e contacto aki el a trece e puntonan aki pa dilanti.  E ta haya cu StimAruba mester trece e puntonan aki padilanti a base di loke nan ta mira, y ora cu e hendenan interesa ta puntra riba esey, nan ta responde tambe kico nan ta weita.

Nan a weita recientemente e likmento aki ora cu nan a bay pa e pleymento ariba un diamars cu nan a organisa specialmente pa muchanan tocante e balor di nos manglenan.  Aunke nan a haya poco mucha, e ta consciente cu e grupo cu a participa y tabata presente,  ta esun berdaderamente interesa den nos medio ambiente.

Un dia prome hunto cu e departamentonan concerni nan a bay coy e simianan na Spaan Lagoen pa asina bay sembra nan, hunto cu nan y e muchanan. “Nos mester haci algo cu nos mangelnan y nan a mustra nos unda nos tin cu pley nan.  Cada cuater dia nos ta bay wak e luga”, el a bisa.

Sra. Rasmijn a bisa na Bon Dia Aruba cu e dia ey na mesun momento e ta puntra pa prensa pa asina mustra nan e lik. Pero niun prensa tabata ey pa atende e actividad aki y por a mira e lik. Ta asina cu el a dicidi di lag’e e cos aki para te asina leu. E likmento aki ta tumando luga, pero e ta laga esunnan interesa pa nan mes bay rondia.