Na april di e aña aki, e team di investigacion fiscal di Departamento di Impuesto: ‘FIOT’ (Fiscale inlichtingen- en opsporingsteam) a bolbe cuminsa ta bishita e personanan na kende a otorga e formularionan di declaracion di inkomstenbelasting/prima di seguro social di aña 2012 y 2013 y cu no a entrega e declaracionnan menciona.
Te cu awor a bishita alrededor di 140 comerciante na cas. Di e grupo aki, a manda un di dos recordatorio (aanmaning) y un duplicado di e formularionan di declaracion menciona na 108 persona y a duna nan un otro oportunidad pa entrega e declaracion. Sinembargo no tur persona a cumpli cu nan deber fiscal.
Di e personanan cu a wordo bishita, mas o menos 35 di nan so a cumpli cu nan obligacion y a entrega e declaracionnan di inkomstenbelasting/prima di seguro social di aña 2012 y 2013.
Pa e personanan cu a wordo bishita na april y cu no a cumpli cu e deber di haci declaracion, Fiot lo traha un proces-verbaal pa esunnan cu deliberadamente no haci declaracion. Esaki lo bay sosode den transcurso di aña pa tur persona cu a wordo bishita y cu no a cumpli cu nan deber fiscal. Ministerio Publico lo bay dagvaar e personanan aki como sospechoso y lo presenta e caso na hues. E prome sesion di corte fiscal cu ta sigui ta planea pa dia 1 di november 2016. Pa e sesion aki mas o menos 25 persona lo wordo dagvaard debi cu nan no a haci declaracion. A palabra cu griffier di Corte den prome instancia pa reserva un cierto cantidad di dia pa tratamento di e casonan aki.
Ta importante pa tene na cuenta cu si un persona deliberadamente ta keda sin haci declaracion di inkomstenbelasting, por haya castigo di prizon te maximo 4 aña y/of un boet di categoria 5 cu ta maximo Afl. 100.000,-. Na final hues lo duna un veredicto y lo determina e sancion cu tin cu wordo implementa. Den caso cu hues duna un veredicto cu ta indica un castigo, esaki lo tin como consecuencia tambe cu e ‘strafkaart’ di e persona lo bay wordo yena cu e castigo aki. Esaki ta algo cu no tawatin mester di yega asina leu. Pa e motibo ey Departamento di Impuesto ta haci un apelacion na su clientenan pa cumpli cu entregamento di e declaracion di inkomstenbelasting pa evita consecuencia no desea den futuro.
