ORANJESTAD – Den dianan aki, e comunidad di Aruba a scucha fuerte rumornan di ceramento di ‘Certified Supermarket’, un supermercado icono cu tin hopi añanan ofreciendo pa turistanan y comunidad productonan y articulo di hogar.

Bon Dia Aruba a bay te na e luga pa nos por haya informacion di e situacion cu e supermercado ta atravesa den e momentonan aki. Nos a logra tuma contacto cu sra. Luz Angela, kende ta manager di e luga, y el a splica cu no por ofrece un declaracion oficial pa motibo cu mester pidi permiso di parti di su hefe.

Bon Dia Aruba a purba varios biaha via telefon pa por logra haya un declaracion oficial di parti di supermercado Certified, pero ni Angela ni e doño di e establecimento a tuma contacto cu e redaccion aki.

Di parti di e comerciantenan cu tin su negoshi den e centro comercial ey, Bon Dia Aruba a papia cu sr. Leonardo Cano, kende a expresa su preocupacion riba e situacion di e centro comercial y supermercado. Cano a bisa cu ta existi hopi reserva riba e tema aki, ‘nos no sa nada’, el a sigura.

Tambe a duna di conoce cu e benta na su negoshi ta ‘regular’, pa motibo cu e supermercado ta e curason di centro comercial y esey ta afecta tur e comerciantenan. “Nos como comerciantenan ta den incertidumbre, nan como doño of representante di e luga mester papia cu nos, laga nos sa kico ta pasando”, Cano a bisa.

Cano tambe a agrega cu nan a cera parti di e centro comercial pa via cu ‘supuestamente’ nan lo haci un restructuracion di e luga, pero nan no sa e motibo di e restructuracion. E rumor cu ta coriendo entre e comerciantenan di e centro comercial ta cu nan lo bay haci un universidad of un supermercado igualmente, pero mas actualisa.

Segun Cano, el a splica cu e supermercado a kita hopi empleadonan cu tabatin mas di 15 y 20 aña trahando den e luga, y awo a keda tres of cuater so.

Cano a comenta cu e tin expectativa cu si e supermercado lo bay traha di nobo cu e restructuracion cu nan ta haci caba, y esey ta algo hopi bon pa nan, pa motibo cu tin un bon luga y ta bale la pena.

Tambe Bon Dia Aruba a haya e declaracion di otro comerciante, sr. Juan Carlos Velez, kende a expresa cu e tin 20 aña trahando den e luga ey. Tambe a bisa cu na e momentonan aki, e ta sinti hopi preocupacion pa motibo di e trabounan cu varios luna pasa e doño ta haciendo paden di e centro comercial. “Nan no a papia cu nos di kico nan ta haciendo eynan, nan tin anos di un manera aisla, nan no ta duna informacion di nada, y e manager nunca a reuni cu nos pa duna un informacion mas claro”, Velez a comenta.

Velez a sigura cu tambe nan tin e luga hopi descuida, no tin servicio di siguridad, e baño di e luga e mayoria di biaha ta sushi y cu mal holo, ‘nan no tin interes pa nos cu tur luna responsablemente ta paga un huur, y nan no a tuma den cuenta nos opinion pa nan haci loke nan kier e dia cu nan kier haci’, asina el a expresa.

Velez a splica cu e tin su negoshi eynan pa motibo cu el a haci un negociacion cu e doñonan di e centro comercial pa via di e dificil situacion cu e negoshi tabata pasa economicamente, y door di esey, el a reduci espacio den su negoshi y asina el a habri otro local na otro luga,
‘pasobra mi no sa kico lo por pasa akinan’, el a agrega.

Ta importante pa duna di conoce cu e comerciantenan tin interes pa e comunidad sa cu e supermercado lo bay cera, pero no e negoshinan cu ta paden di e centro comercial. Nan ta sigui traha di manera normal, ofreciendo pa su clientenan un miho servicio comprendiendo cu nan ta atravesa un problema pa via di e mal informacion.