Comerciantenan Uni: “Mester bin un aclaracion pa pueblo y comerciantenan riba descuento pa compras online”

Frans Ponson ken ta fungi como presidente di e organisacion Comerciantenan Uni, recientemente a trece dilanti un punto di preocupacion cu nan tin for di algun tempo pa loke ta trata e descuentonan pa comprasnan online ya cu Aduana segun el a sigura si ta acepta descuento den cierto casonan pero den otronan no.

Pa esaki Ponson a sigura cu na 2022 nan a bin dilanti cu un preocupacion cu nan tin cu Aduana waarde cu ora comercio of pueblo di Aruba ta cumpra algo riba Amazon of online, nan ta wak cu Aduana semper tabata schraap e prijs cu e persona ta paga y ta laga paga un tarifa cu no tin e descuento.

Segun Ponson nan a reuni cu Aduana e tempo ey na unda a manda un carta na tur Aduana y tur hende cu ta traha cu facturanan manera Ponson por a compronde, “Aduana no tabata acepta e rebaho door cu nos sa di cua tipo di descuento tabata referi na dje,” e documento cu Ponson a lesa di Aduana ta indica.

Ademas di esey tambe a sigura cu for di e momento ey na 2022, “ora ta trata di descuentonan cu ta bin online shopping, Aduana lo acepta e descuento sin specificacion.”

Pero manera Ponson ta sigura, lamentablemente e aña aki nan ta hayando casonan cu por prueba cu Aduana no ta aceptando esaki atrobe, “nos ta lamenta esaki pasobra por ehemplo, un cliente a cumpra un frigidaire riba un special di Black Friday y nan tin cu paga di invoerrechten riba e dobel di e prijs.”

Ademas, nan tambe ta wak cu cierto Aduana ta laga pasa esaki y otronan no, segun Ponson ta declara bisando cu algun funcionario a bisel’e cu “nan no ta worry cu e papel aki, nan no ta acept’e pasobra abao den e mesun carta cu Aduana a manda ta bisa cu nan ta tuma maximo 5% di cash discount, mi ta kere esaki ta un bruhamento, pasobra 5% di cash discount no tin nada di haber cu un compania cu ta dicidi cu e ta haya un special, mi no sa si tin un mal comprendemento.” Ponson a bisa.

Awor na 2024 nan kier resolve e problema aki y trece un clarificacion no solamente pa pueblo sino pa comerciantenan y pa tur hende di kico ta acepta y kico no ta acepta, “si comerciante of pueblo ta sigui acepta e cos aki, mi no ta bisa cu Aduana no mester tin e poder pero si mester bin un clarificacion ariba esaki,” Ponson a menciona.

Den nan opinion, segun nan abogadonan nan ta kere cu tin cu atende cu e parti aki di Aduana y Aduana mester bin dilanti pa duna un clarificacion riba e topico di ken tin rason, si ta acepta descuento of no ta acepta descuento, cu mester bin den un carta oficial.

Den e carta cu Ponson ta referi na dje, el a bisa cu tin e firma di director di Aduana Ricky Croes, esey a bay na tur Aduana y ta hinca den e sistema ASYCUDA.

Ponson ta sigura cu full pueblo di Aruba ta perhudica cu esaki na unda el a papia di un caso di un persona cu a haci un orden online y e persona en cuestion a haya casi 10.000 florin mas na Aduana pa motibo cu nan no a acepta e 40% di descuento cu e producto tabatin oficialmente.

“Pero Comerciantenan Uni no ta para pa concur invoices, nos no ta para pa esey, nos tin cu haciel’e legalmente y mester bin un aclaracion riba esaki,” Ponson a comenta.

Aduana segun e carta cu Ponson a menciona, ta bisa cu nan no sa ki descuento ta trata pero Ponson ta enfatisa cu tur hende por haya descuento riba comprasnan online.

Den su parecer, e ta kere cu e ley pa esaki ta masha anticua mes cu den dje no tin puntonan cu ta regarda comprasnan online y cu na e momentonan aki Aduana mester bin cu un landsbesluit entre ministernan pa sigura cu aunke e ley no a ser cambia, tin un landsbesluit pa por acepta esaki aworaki “door cu esaki no ta documenta, door di esey nan no ta hacie pero aworaki nos ta na 2024 y nos a atende cu esaki dos aña pasa caba, kiermen ban traha un landsbesluit y ban fix e, nos mester atende esaki.” Ponson a menciona.

Riba e pregunta si nan ta bay pone un deadline pa Gobierno por drecha e situacion aki, Ponson a sigura cu esey ta algo cu nan no kier haci pero den su opinion, e miembronan di Comerciantenan Uni kier un contesta of nan lo mester bay corte cu loke ta sucediendo y e ora ey laga un hues dicidi si ta nan abogadonan esnan cu tin rason of Aduana y Gobierno di Aruba tin rason, “no ta importa ken tin rason pero mester trece un aclaracion oficial si nos ta acepta esaki si of no y nos tin cu dicidi si ta Amazon so y kico ta pasa si bo lo cumpra na AliExpress, kico ta pasa cu esey?”

Pa finalisa, Ponson a señala cu tanto Gobierno di Aruba como Aduana mester yega na mesa cu nan den menos di dos siman pa por trece dilanti kico ta e decision riba e asunto aki.